Paris St-Germain-ah Messi a chiang : Paris-ah 'Lal' thar a piang dawn ta

Paris St-Germain chuan nimin khan Lionel Messi nen inremna an nei ta a.

French club hian khawvel player ropui ber ang hiala chhal theih hi an lalut dawn ta a; Argentina captain hian PSG zawm turin medical chiah a hmabak tawh.

Messi hian kum hnih daih contract a ziak ang a, kum khat pawh sei theih a ni ang. An inremnaah hian Messi-a'n kum khatah euro maktaduai 35 (£29.6m) a hlawh ang - hetah hian bonus a tel vek. Bonus tel loa a hlawh hi euro maktaduai 25-a ngaih a ni.

Spanish football hre chiang bik Guillem Balague chuan, "A chiang tawh e. Lionel Messi chu PSG player a ni dawn ta. Barcelona tana khelh zel turin ruahmanna siam mah se PSG tan a khelh ṭul ta. A kum hnih contract ziah tur hi a pawt sei dawn em tih chu PSG a khelh ṭhat dan leh Qatar World Cup-a a khelh danin a hril ang," tiin nimin tlai khan a sawi.

Messi hian Barcelona-a cham turin a hlawh chu 50% a tihhniam a huam a, Catalan club hian La Liga salary cap vangin an chelh thei lo.

Barcelona-in Ningani khan Messi chhuah tur thu an puang a, hemi hnu hian PSG leh Messi agent (a pa Jorge Messi) leh lawyer-te an indawr ṭan nghal.

Jorge Messi chuan, "Vawiin-ah Paris Saint-Germain nen Messi contract kan ziak fel vek ang," tiin nimin khan a sawi.

Messi aiawhte leh PSG chuan vawiin lama press conference neih leh tlangzarhna turin ruahmanna an siam niin Italian journalist Fabrizio Romano chuan a tarlang.

French club PSG manager hi Argentine mi Mauricio Pochettino a ni a, Argentine player Angel di Maria, Leandro Paredes leh Mauro Icardi te an awm.

Messi an lakluh theih nan player thawh hlawk ber erawh a ṭhianpa Neymar a ni a, Brazilian forward leh Argentina captain hi Barca-ah an khel dun ṭhin.

Messi hian kum 13 mi a nihin Barcelona hi a zawm a, Catalan club tan hian match 778-ah goal 672 khungin nomawi vawi 35 a chawipui a, an player ropui ber a ni.

Argentine forward hian Ballon d'Or vawi ruk a dawng a, footballer piang tawha ropui bera ngaitu an tam hle.

Tunah erawh Messi hian PSG a zawm dawn tih a chiang tawh a, engkim a kaltluang a nih phei chuan Pochettino hoten Inrinni zan dar 12:30-a Strasbourg an mikhual hunah a inlan thei hial ang.

PSG hian tun nipui bazarah hian free transfer-in player langsar midfielder Georginio Wijnaldum, defender Sergio Ramos leh goalkeeper Gianluigi Donnarumma te an lalut tawh a, Messi hi a thlawna player lakluh palina tur a ni.

French club hian euro maktaduai 60 velin Inter Milan aṭangin full back Achraf Hakimi an lalut tawh bawk.