Season bul ṭan lo tur Robertson

Liverpool defender pawimawh Andy Robert-son chuan a ke rek hliam avangin season bul a ṭan ve thei dawn lo a, thla khat tal chu chawlh mamawh tura ngaih a ni.

Kum 27 mi left back hi Liverpool leh Athletic Bilbao ten friendly match an khelh ṭumin a inhliam a, a hliam hi a tirah tak chuan a nat hmel hle.

Mahse, Scottish defender chuan, "Endik a nih hnuah hlauh-thawnawm lutuk a awm lo a, mahse, hliam engemaw enkawl dam ngei ngai a awm ve a ni," tiin a hliam chungchang chu a sawi.

Liverpool coach Jurgen Klopp chuan, "Andy chungchangah hian kan vannei zawk a, hei aia hliam na thei a ni. Video en kha chuan a hlauhthawnawm em em a, mahse, a chawlh rei a ngai dawn lo hlauh a, kan vannei takzet.

"International break ṭan tir (September thlatir) nge a tawp lamah a rawn kir dawn erawh sawi chian theih a ni lo," a ti a, thla khat tal a chawl dawn tih erawh a chiang.

Liverpool hian an pre-season friendly match hnuhnung berah Thawhṭanni zan khan Osasuna chu 3-1 in an hneh a, Takumi Minamino shot chu Jesus Areso Blanco chuan an lamah tilutin Roberto Firmino chuan goal hnih a khung ve bawk.

Anfield-a inkhelah hian Liverpool defender thar Ibrahima Konate chuan inkhel bul a ṭan a, RB Leipzig aṭanga pound maktaduai 36-a Reds zawmtu defender hian tlarhnung laiah Joe Gomez chu a kawppui a ni.

Konate chuan, "A nihna takah chuan khelmual ka luh ruala ka ngaihtuahna kha sawifiah dan pawh ka thiam lo," tiin Anfield-a inkhelh chu nuam a tih thu a sawi a, Liverpool khelmualah hian fans 40,000 bawr velin inkhel an en.

Reds hian August 14, zan dar 10:00-ah Norwich City lenchilhin an Premier League zinkawng an zawh ṭan dawn a, Burnley, Chelsea leh Leeds United an hmachhawn zui leh ang.