Kane-a'n Man City a hmachhawn dawn - Nuno

Tottenham Hotspur manager Nuno Espirito Santo chuan Premier League season thar an ṭan hunah Harry Kane a inlan nghal theih a beisei. England captain hian tun kar tawpah Manchester City a hmachhawn thei dawn tihna a ni.

Season hmasa zawh hlimah Kane hian Spurs chhuahsan a duh thu a sawi, nomawi chawi a duh vang a ni. Euro 2020 zawh hnuah Tottenham training a zawm mai lo a, tunah chuan mimal training a nei tawh.

Premier League champion City nen Kane hi sawizawm mek a ni, inbiakna pawh a awm tawh ngei. Mahse, Spurs lamin awlsam taka chhuah mai an hreh avangin indawrna hi a hlawhtling nghal mai lo.

Nuno chuan, "Player zawng zawng nitin rim taka training neite chu inkhel tura thlan theih vek an ni," tiin Man City hmachhawn thei zingah Kane a sawi tel, a theih hram chuan an striker ṭha mi hi chelh an duh niin a lang.

Kum 28 mi Kane hian Tottenham tan league match 245 a khelh aṭangin goal 166 a khung tawh, inelna hrang hrangah chuan match 336 aṭangin goal 221 a khung - goal khung thei viau mah se a club hi nomawi a la chawi pui lo.

August 15, Pathianni zanah Spurs leh Man City te hi an league match hmasaah an intawng dawn - North London club tan Kane a inlan a nih pawhin, season tluanin Tottenham tan a khelh a rinawm tawh lo.