Man City-ah Stones a nghet

Manchester City defender John Stones chuan kum nga daih contract thar a ziak - tuna an inremna ang chuan English defender hian Etihad Stadium-ah kum 2026 thleng a khel chhunzawm dawn tihna a ni.

Stones hian 2016 August thla khan Everton aṭangin Man City hi a zawm, pound maktaduai 47.5 man niin a club tan hian match 168 a khelhsak tawh - Premier League nomawi ringawt pawh vawi thum a chawi tawh.

Kum 27 mi Stones hian City a zawm tirhah rin a hlawh, a hnuah tlak hniam deuh lai nei mah se season hmasa khan a rawn tho chhuak leh. Season hmasa khan Pep Guardiola kaihhruaina hnuaia an hlawhtlin theih nan player pawimawh a ni phak.

Contract thar chungchang sawiin Stones chuan, "Man City squad-ah awm hi a nuam, player thiam leh ṭha tak tak kianga awm hi a nuam em em a, hlawhtlinna dang chan zel ka duh. Nomawi dang chawi leh chu ka thil tum leh duhthusam pawh a ni," a ti.

Euro 2020-ah khan Stones hi ram tan a feh chhuak a, final an thlen thlengin match zawng zawngah a inlan kim vek. 2021 PFA Team of the Year zinga tel hi season tharah pawh Ruben Dias nen City thlarhnungah an inkawp a rinawm.

City director of football Txiki Begiristain chuan Srones chu player ṭha bik leh an club khelh dan nena inmil a nih thu a lo sawi ve bawk.