India aiawh turin Apuia; Lianzuala a chawl
September thlaa international friendly khelh tur atan India coach Igor Stimac chuan August 15-a training zawm turin player 23 a ko a, Mizo tlangval zingah Lalengmawia (Apuia) chauh a tel - inhliam Lallianzuala Chhangte a âwl.
AFC Cup khel tur ATK Mohun Bagan leh Bengaluru FC aṭangin player 13 koh an ni a, anni erawhin inelna an hmachhawn zawhah training camp hi an zawm chauh dawn.
Mizo dinhmun
India team-ah hian Jeje Lalpekhlua chu a serh zinga a mei ang maiin a tel ngei ngei ṭhin a, tun hnaiah erawh Hnathial tlangval hi zai a nih hnuah an ko tel ta meuh lo. Jeje-a ram tana a inlan hnuhnung ber chu January 14, 2019-a Bahrain nen a inkhelh ṭum daih tawh kha a ni.
Jeje hi Lunglei tlangval Lallianzuala'n a hnung a rawn zui a, Chennaiyin FC forward hi a inhliam a, a chawl dawn. Lianzuala chuan, "Coach nen kan inbia a, ka kawng nâ enkawl a ṭul avangin awl rih a ṭul," tiin Vanglaini hnehah a tel loh chhan a sawi.
Mizo tel awm chhun chu Apuia a ni a, Vaivakawn tlangval hi ISL player man to ber a ni. Mumbai FC chuan NorthEast United aṭangin Mizo tlangval hi vaibelchhe hnih bawr velin an lei a, a la junior deuh a, India team-a hmun pawimawh chang tur chuan hmabak a la nei thung.
India dinhmun
India hian September 2 leh 5-ah Nepal nen Kathmandu-ah friendly match ṭum hnih an khel dawn a, October thla hian SAFF Championship an khel ang.
Croatian coach Igor Stimac hnuaiah India an che ṭha tawk lo a, kumin chhunga vawi li an khelh tawhah Bangaldesh chiah an la hneh. Kum 2020 khan match an nei lo a, kum 2019 khan vawi hnih chiah an chak - result enin he coach hnuhma hi a chhe hle.
Blue Tigers hian World Cup 2022 qualifier an khel zo tawh a, Qatar-ah an zin ve thei dawn lo. Asian Cup 2023 khel tur pawhin Asian Cup qualifying third round an khelh a la ngai a, kawng a la thui hle.
India Squad
August 15-a camp zawm tur player 23
GOALKEEPERS: Dheeraj Singh Moirangthem, Vishal Kaith.
DEFENDERS: Asish Rai, Seriton Fernandes, Rahul Bheke, Adil Khan, Chinglensana Singh, Narender, Akash Mishra, Mandar Rao Dessai.
MIDFIELDERS: Bipin Singh, Brandon Fernandes, Lalengmawia, Glan Martins, Jeakson Singh, Anirudh Thapa, Sahal Abdul Samad, Yasir Mohammed, Halicharan Narzary.
FORWARDS: Rahul KP, Farukh Choudhary, Ishan Pandita, Rahim Ali.
ATK Mohun Bagan leh Bengaluru FC player-te (AFC Cup khelh zawhah India camp an zawm ang)
GOALKEEPERS: Amrinder Singh, Gurpreet
Singh Sandhu
DEFENDERS: Pritam Kotal, Ashutosh Mehta, Sandesh Jhingan, Subhasish Bose.
MIDFIELDERS: Udanta Singh, Pronay Halder, Suresh Singh Wangjam, Ashqiue Kuruniyan
FORWARDS: Liston Colaco, Manvir Singh, Sunil Chhetri.