Man United-ah Martial a châm dawn

Manchester United-in Anthony Martial an hralh dawn tih thuthang awm mah se French forward hi Old Trafford-ah a cham dawn. Kum 25 mi Martial hi Inter Milan nen sawizawm ni mah se Serie A champion hi an sum dinhmun avangin player thar lak an harsat a rinawm.

Man United-in Martial hi hralh an phal lo a, Ole Gunnar Solskjaer-a hmachhawpah a tel phak avangin a chhuak lo ang. Martial hian kum 2015 khan Monaco aṭangin Man United hi a pan a, season liam ta khan inhliam vangin league match 22 chiahah a inlan.

Martial hian English club tan league match 167 a khel tawh a, goal 55 a khung tawh. Hetihlai hian Man United player thar Jadon Sancho chuan Thawhṭanni aṭang khan training a zawm a, August 14, Inrinni tlai dar 5:00-a Leeds United an hmachhawn hunah a tel hman beisei a ni.

Real Madrid aṭanga Man United zawm tur Raphael Varane pawh Manchester-ah Covid-19 dan zawm a ngaih avangin a inkhung hrang a. French defender hi nimin khan Covid-19 test a negative a nih chuan medical nei nghal tura beisei a ni a, vawiin hian Carrington-ah contract ziahfel bakah training zawm hman turah an ngai.