Fak hlawh lo val Rafa Benitez

Khawvelin Pep Guardiola, Jurgen Klopp leh Jose Mourinho-te a hmelhriat hma khan manager hlawhtling tak pakhat a lo awm tawh a, a phu ang tawk erawhin fak a hlawh lo hle.

Real Madrid B team atanga a coaching career ṭantu coach hi a hming chu Rafael Benitez a ni a, Spanish manager ropui hian club tam tak zingah Liverpool, Real Madrid, Inter Milan, Chelsea leh Newcastle United te lo enkawl tawh mah se a chanchina ropui lai ber erawh 2001-2004 inkara Valencia a enkawl lai kha a ni.

Ni e, Liverpool-ah Champions League nomawi meuh chawiin final-a AC Milan an hneh kha 'Miracle of Istanbul' tiin sawi mah se hriatreng a hlawhna erawh Valencia khawpui a ni a, chu hmuna chengte chuan vawiin thlengin Spanish manager chanchin hi tui takin an la sawi ṭhin.

Premier League-a Liverpool a enkawl laia Jose Mourinho nena an inchal tauhna chanchin ngaihnawm takte, Sir Alex Ferguson nena an inkara khi awm media hmaa an pholan dan te kha ziah tham fe a awm a, vawiinah erawh Valencia bawk hi kan tuina ber a ni lo thei lo.

Spanish football chu Real Madrid leh Barcelona rorelna hmun a ni a, club lian pahnih rorelna karah hming dang a lang thei meuh lo - kum 2000 chho pawh khan he thawnthu tho hi a ngai rengin ziah a ni a, mi tam takin milian pahnih cho phak tur hi hmuh an chak.

Hetihlai hian Valencia chuan team pangngai tak dinin Hector Cuper-a enkawlna hnuaiah kum 2000 leh 2001-ah Champions League final an lut ve ve a, Real Madrid leh Bayern Munich ngam loin an tlawm ve ve thung.

Mahse, Cuper hian tih theih loh pakhat a nei - league lamah beisei a phak lo a, 2001-ah pawh Champions League final lut mah se La Liga lamah pangana an ni pha ṭawk a, a hma lawka final an khelhna inelnaah an inlan thei lo chhunzawm. 

Cuper-a'n Inter Milan lam hawiin a puanthuah a tel zui a, Valencia lamin coach hna zawn an ṭan ve thung. La Liga 1999-2000 a Deportivo La Coruna champion puitu Javier Irureta, UEFA Cup final-a club tenau Alaves hruai thlengtu Mane leh Atletico Madrid coach hlui Luis Aragones-te an sawm a, an hlawhchham vek!

Coach zawnga Valencia an buai lai hian club director zinga mi Javier Subirats chuan hriat la hlawh lo tak Rafael Benitez-a theihna sang tak a lo hre lawk diam a, Spanish manager hi Valencia coach atan lakluh a nih theih nan club chhungkuaa a hmin theih ang chu a hmin kual a, theihtawp a chhuah.

Hetihlai hian Benitez hian club lian a la enkawl ngai lo. Second division club Tenerife chu Real Betis leh Sevilla chiah phak lo chunga pathumna nihpuiin La Liga a inhlankaipui a, Benitez-a'n top flight football a temna hmasa ber tur a ni.

Mahse, Valencia an lo lang a, a hmaa chona inchhawp chu huphurhawm viau mah se a phurawm tel miau avangin lung si takin a pawm a, Valencia fan-te erawhin inringhlel leh hlauthawng tak chungin an la hriat ngai loh coach an lo lawm.

Benitez-a'n Valencia a zawm hma season 17 chhung hian La Liga-ah Atletico Madrid (1996) leh Deportivo (2000)-in hnehna hlado chhamin league nomawi an chawi ve a, a bak zawng chu Real Madrid leh Barcelona 'ta' a ni!

Benitez tan Real Madrid leh Barcelona lalṭhutthleng pheh thlak a, La Liga-a rorel tum chu hnamchawm tlangval tana Lal fanu chhai thluk tum ang mai a ni a, lunglengin a zai thlawn ang tih chu hlauhawm tak a ni.

"Coach langsar lakluh ṭhatna chu player langsar an chhawm tel hi a ni," tiin an sawi ṭhin a, club tenau enkawl ṭhang coach tan player langsar hip chu thil harsa tak a tling. 

Benitez tan pawh hei tak hi a harsa lai chu a ni. Tenerife aṭangin striker Mista a chhawm tel a, a hma lawka second division khel ve mai a nih avangin he 'transfer' hi Valencia fans tan lawma zuanpui tur a ni lo. 

Benfica aṭangin hriat hlawh lo Carlos Marchena a lalut a, attacking midfielder ṭha Zlatko Zahovic chu Portuguese club lamah hian a kaltir thung. Francisco Rufete chu Malaga aṭangin a lalut a, Tenerife-a loan-a a hawh Curro Torres chu a ko kir bawk. 

Spanish manager hnathawh kan fak rualin a vanneihna hi chhiar hmaih theih a ni bik lo. Valencia a zawm tirh hian a hunlaia khawvela goalkeeper ṭha ber pawl Santiago Canizares chu si ban nghaktu a ni a, tlarhnungah Roberto Ayala, Amadeo Carboni leh Mauricio Pellegrino-te an awm sa bawk. 

Benitez-a'n a team chakna hnar chu tlarhnung a ni tih a hrethiam nghal thuai a, Valencia-in 4-4-2 diamond an hman thiam sa chu thlaksakin 4-2-3-1 formation a hmang a, hriat tel tur chu hetihlai hian European football-ah 4-2-3-1 hi an la hmang uar lo hle. 

Khawvelin striker pahnih tal hman an uar laiin Benitez hian striker pakhat chu rinna nghah nan a hmang a, a hma lawka Cuper-a hman uar sa John Carew leh Juan Sanchez dah ṭhain Mista chungah rinna a nghat a, a maltlat tir. 

Mista thlawp turin player thiam bik Pablo Aimar chu a hnung chiahah a awm a, Valencia game cheimawitu a ni. Vincente leh Rufete chu mual sir aṭanga nawrtuah hman an ni a, David Albelda leh Ruben Baraja-te chu defensive midfielder an ni. 

Rafa Benitez-a'n squad a neih ṭhat thu sawi mah ila a elpui Barcelona leh Real Madrid hi an theuneu lo hle. Catalan club hian Rivaldo, Patrick Kluivert leh Marc Overmars-te ho an la kawl a, team zuamawm an ni lo. 

Real Madrid lahin a zawna season hnih nan world record transfer an siam a,  Zinedine Zidane an lalut -  Luís Figo, Iker Casillas, Raúl leh Roberto Carlos nei sa team an ni a, Benitez tan fimkhur a ngai tih a lang reng. 

Benitez-a'n a chakna a hria a, a tisual lo. Season a tawp meuh chuan Barcelona leh Real Madrid zuan khumin table chung ber an luah a, match 38-ah goal 51 chauh khung mah se an lamah goal 27 lek a luh avangin an champion. 

Valencia hnuaiah Deportivo La Coruna, Real Madrid leh Barcelona te ho an intlar a, kum 31 hnua Valencia-in league nomawi an chawi hmasak ber a ni. Valencia tan chuan Benitez chu hero a ni a, ani lo chu Lal dang an duh lo. 

Valencia goal khung tlem avangin Benitez-a team hi team hmuhnawm lo takah i ngai a ni mai thei - mahse, a ni lo. He team hian Aimar-a thiamna hmangin attacking game hmuhnawm an pho chhuak a, mit ti tlai an ni. 

Mahse, 2002-03 season a her chhuak a, Valencia-in beisei an phak lo. Nipui bazar-ah player langsar lakluh an nei lo a, January-a loan hmanga Anthony Reveillere an lakluh chu 2002-03 season-a an player langsar lakluh awmchhun a ni. Benitez tan squad neihsa thuam chak lehzual nan chuan a pan mah mah. 

Season a tawp meuh chuan Valencia hi pangana an ni hram a, Champions League-ah quarterfinal thlengin Inter Milan lakah an tlawm. Benitez-a'n ual au takin Champions League nomawi chawi a duh thu a sawi a, Valencia hian league leh European football inelna ngaihhlut hlawha rilru pek an zo lo a ni ber. 

Mahse, mi huaisen danglamna chu an tluk hnuah pawh an tho leh ṭhin hi a ni a, chu danglamna chu Benitez leh a nauten pholan ngei an tum - 2003-04 season-ah team ṭha zawk niin an lo lang a, dang theitu an awm lo. 

Valencia-in Champions League pawh khel phak lo chungin 2003-04 season an hmachhawn a, mahse hei hi an ropuina belhchhatu zawk a ni. Season a tawp meuh chuan La Liga leh UEFA Cup-ah an champion!

Real Madrid laka an chan tawh league nomawi chu la letin goal 71 ngawt an khung a, he team hian defending chauh ni loin goal nawr pawh an thiam tih an pholang chiang hle - he season-ah hian goal 72 khungtu Real ai chiahin an khung tlem. 

Valencia tan tlarhmaah Mista chu innghahna lungpui nghet a ni a, inelna hrang hrangah goal 24 a khung - UEFA Cup nomawi an chawi theih nana Marseille laka a goal khungte kha mitthlaah hian ava cham rei ta em!

Benitez-a hnuaiah Valencia-in ropuina an chhar mawlh mawlh a ni ber a, Barcelona leh Real Madrid chhuk en chunga Spanish football roreltu nih chu Valencia fan-ten a aia nuam an hre chuang lo. 

Valencia-in match thum khelh tur la nei chungin La Liga nomawi an chawi a, UEFA Cup final-a hnehna chang turin harsatna an tawk lo. Valencia hotuten lawm avanga Benitez bianga fawp mai tur an nih laiin an hawisan a, a pawi zo ta. 

Hlawhtlinna ropui tak a chhar chungin Benitez-a'n player lut leh chhuakah thu a nei tawk lo a, hetihlaia club director of football Jesus Garcia Pitarch nen an inhmu thiam lo a, Benitez-a chhuak tau. 

Coach pawisawi hlau lo ve tak Benitez chuan, "Ṭhutna dup nuam tak lei ka duh a, mahse êng chhit tur min leisak daih a ni," a ti a, defender a duh laia attacking midfielder Fabian Canobbio an lalut chu a hrethiam lo. 

Liverpool-in he hun hi remchangah la vatin June 2004 khan Benitez an lalut a, thawnthu sawi zawm a ngai tawh lo - Valencia erawh Benitez chhuah hnuah tho leh tawh loin club naran an ni ta reng a, fan-te erawhin Benitez hming an lam bang lo.