All England champion Viktor Axelsen

Badminton inelna ngaihhlut Yonex All England Open-ah Viktor Axelsen chu a vawi khat nan a champion a, Denmark player zingah Peter Gade, Morten Frost leh Erland Kops te hnung zuia hlawhtlinna chang thei palina a ni.

Hmeichhe inelna lamah Tai Tzu-ying chuan world number 1 Chen Yufei hnehin a champion bawk, Chinese Taipei hi a vawi thum champion-na chiah a ni a, tun hnai kum li chhunga vawi thum champion theih a nihna hi a ropui hle.

Badminton World Federation hnuaia chuan All England hi season khat chhunga Super 1000 World Tour tournament hmasa ber a ni, a hmuna entu nei chungin inelna hi an zo. BWF-in coronavirus vanga chawlh a puan rih avangin inelna dang erawh April 12 thleng chu an khel rih lo ang.

Pathianni zan khan Arena Birmingham-ah final hmuhnawm kan hmu, world champion pawh ni tawh Axelsen hian minute 46 chhungin seeded pakhatna Chou Tien-Chen lakah hian 21-13, 21-14 in hnehna a chang.

Season hmasa khan Axelsen-a'n final lut mah se world number 1 Kento Momota a ngam lo. Kuminah Japan tlangval Momota chu a mit (eye) zai a nih avangin a inlan thei lo, champion lai inlan theih loh hlanin Denmark tlangval a vanneiah a ṭang ta a ni. Kum 26 mi Axelsen chuan, "Badminton player zawng zawng hi chuan All England Open champion nih an chak ṭhin, tunah chuan ka duhthusam chu a takin a thleng dik ve ta," tiin a sawi.

Badminton mipa inelna hi Asian player ten an thunun hneh hle a, Denmark tlangval Axelsen bak hi chu tun hnaiah phei chuan hming langsar an awm meuh lo. European player ten kum 21 chhung nomawi an chawi theih tawh lohna hmunah hlawhtlinna a rawn chang ve leh chiah.

Danish shuttler Axelsen hi semifinal-a world number 13 Lee Zii Jia nen an inkhelh ṭumin game hmasa berah a chesual a, game hnuhnung pahnihah erawh a chungnung viau; final bikah chuan talbuai lai nei loin a chungnung.

World number 7 Axelsen chuan, "All England Champion ka nei ve ta mai hi a mak, player ropui leh ṭha tak tak ten hlawhtlinna an lo chang tawh ṭhin, an zinga ka hming a chuang ve mai hi a mak takzet. Ka lawmna hi thua sawi chhuah thiam a ni rih lo a, hlim taka awm tawp a ni rih mai.

"Mipui thlawpna ka dawng ṭha hle a, hri leng vangin infiamna chawlh ni rih mah se tuna ka hlawhtlinna hian kan ramah chuan badminton a ti lar zual ngei ang tih ka ring. Natna lakah mitin fimkhur turin ka duh a, he hri leng hi thunun a nih thuai ka beisei a, nakin lawkah chuan inelna kan hmachhawn leh thuai ka beisei," a ti.

Badminton World Federation hnuaia inelna zawng zawng hi world ranking siam nan a pawimawh a, tournament hi Tokyo Olympic qualifier a ni nghal zel bawk. Thla khat chuang an chawlh dawn avangin BWF chuan Olympic khel tur zawn danah pawh ngaihtuahna thar a hman a ngai dawn.

All England Open 2020 Champion

Men's Singles    Viktor Axelsen, Denmark

Women's Singles    Tai Tzu-ying, Chinese Taipei

Men's Doubles    Hiroyuki Endo, Japan

    Yuta Watanabe, Japan

Women's Doubles    Yuki Fukushima, Japan

    Sayaka Hirota, Japan

Mixed Doubles    Praveen Jordan, Indonesia

    Melati Daeva Oktavianti, Indonesia