Paris-in an 'lal thar' Messi an tlangzarh
Mumang ram a ni lo a, rinhlelh tur a awm lo a, engkim a chiang ta. Lionel Messi chu Paris St-Germain player a ni a, Barcelona tan a khelh hmasak bera a number hak jersey number 30 a ha dawn.
Messi hian Paris club tan kum hnih atan contract a ziak a, kum khat pawhsei dan a awm. Argentine forward-in Barcelona a chhuahsan chhan hi Catalan club-in La Liga financial fair play rules vanga an chelh theih loh vang a ni.
Boruak a sang
Barcelona-in kar liam ta Ningani khan Messi a chhuah tur thu an puang a, khawvelin a ngaihven nghal. Lang lo lamah PSG-in Messi agent leh a pa Jorge an dawr nghal bawk.
Pathianni khan Messi-a'n Nou Camp aṭangin thlahna thuchah a sawi a, PSG nena an inbiak thu a tarlang. Barcelona kawr ha tawha ropui ber Messi chuan mittui nen Catalan club a thlah.
Mittui pawh a la hul hmain PSG ṭantute erawh Thawhṭanni aṭang khan Paris airport leh PSG khelmual Le Parc des Princes-ah an inhawr khawm tawh. PSG ṭantuten ni khatnaah Messi an nghak chhuak lo a, Thawhlehniah French club leh PSG an inrem a, tlai lamah Paris pan tur Messi leh a chhungte thlalak a darh ṭan.
Zan a nih meuh chuan Paris airport a thleng a, amah nghaktu mi sang chuang hmaah chuan 'Ici c'est Paris' tih chuanna kawr ha chungin a rawn inlan. A kawr hmaa inziak hi eng dang lo, 'A rawn thleng e, Paris' tihna a ni mai.
PSG an inpeih
PSG-in nikum khan Messi lak tumin Barca hi an dawr tawh a, an hlawhchham. Kuminah erawh an beisei ngam lo a, amaherawhchu Catalan club-in an chelh theih thu an puan chiahin rang takin an che nghal.
Hun rei lote chhungin PSG chu Messi dawng sawng turin an inpeih nghal vek a, nizan la la chuan Messi an lakluh thu chu video hmangin an puangzar. Video-ah hian Ballon d'Or paruk leh Eiffel Tower a lang a, dressing room-a Neymar (10) leh Mbappe (7) inkarah Argentina flag an dah. Messi-a'n a larpui jersey no. 10 a ha dawn lo tih a chiang nghal a, a hnu lawkah jersey no. 30 a hak tur thu an puangzar.
Messi hian inremna neih hnuah chauh Paris hi a pan a, airport aṭangin medical neihna lam a pan nghal a, chumi zawh chuan president Nasser al-Khelaifi nen contract an ziak.
Nomawi duh
PSG president Nasser al-Khelaifi chuan, "Messi-a'n PSG a zawm duh hi ka lawm a, Paris-ah hian amah leh a chhungte kan lo lawm e. Ṭha taka khelh a, nomawi lak belh zel a la duh a, kan hmachhawp nen a inang thlap. Kan neih sa world class team-ah hian Leo ka belh dawn a, kan duh chu a chiangin ka hria. Kan club ṭantute tan mellung thar an phum theih ngei ka beisei," tiin a sawi.
French club tan France ram chhunga nomawi chawi hi chu thil thar a ni tawh lo a, kum 10 chhung dawn ramchhung inelna an awp tawh avangin an hmathlir chu Champions League a ni tih a chiang nghal.
Lionel Messi chuan, "Ka football chanchinah phek thar ka kai ta a, Paris-a bul ṭan hi ka nghakhlel tawh hle. Club hma thlir hi ka duh dan nen a inang a, helai hmuna coaching staff leh player-te theihna ka hria. Club leh fan-te tan thil ropui tih ka duh a, Parc des Princes-a inkhelh hun hi ka nghakhlel hle," tiin a phur thu a sawi.
An tlangzarh
Thawhṭanni aṭangin PSG ṭantuten Messi hmuh beiseiin Parc des Princes-ah an pungkhawm tawh a, nimin kha a ni thumna chiah niin French club-in an khelmualah official-in khawvel footballer ropui bera mi tam takin an chhal 'Messi' an tlangzarh.
Messi chuan, "Min lo lawmna hi a ropui ka ti a, minti lawm hle. Barcelona chhuahsan kha harsa ka ti a, chutihrualin hlawhtlin duha tuihal PSG ka zawm hi ka lawm. Barca-in Ningania thuchhuah an neih aṭang khan an ṭuan a rang em em a, inbiakna an la thutak bawk," tiin a sawi a, manager Mauricio Pochettino nen a inhriat ṭhat thu leh French club a zawmna chhan pakhat a nih thu a sawi lang.
French club hian free transfer-in player langsar Georginio Wijnaldum, Sergio Ramos leh Gianluigi Donnarumma te an lalut tawh a, Messi hi a thlawna player lakluh palina tur a ni. French club hian euro maktaduai 60 velin Inter Milan aṭangin Achraf Hakimi an lalut tawh bawk.
PSG hian Neymar leh Kylian Mbappe bakah player langsar dang an kawl sa a, star player rual awm avangin UEFA Financial Fair Play an bawhchhe ngeia ringtu an ṭhahnem hle. Club president Nasser al-Khelaifi chuan, "PSG nena bul kan ṭantirh aṭang khan FFP dan hi kan zawm. Kan financial team ten engkim an endik a, dan zawm chungin Messi kan lalut thei tih an finfiah vek," tiin a insawifiah.
Mbappe chhuak tura sawi chungchang sawi zuiin Nasser al-Khelaifi chuan, "Kylian-a hmalam hun chu kan hre vek ang, amah hi Parisan a ni. Team ṭha a duh thu a sawi a, hei aia team ṭha a awm theih loh," tiin an team ṭhatzia a sawi lang tel bawk.