Hockey player tan nuai 31 ṭheuh!

India hmeichhe hockey team ten Olympic medal hlawh chhuak zo ta lo mah se, an tan chanchin lawmawm a awm tho. Madhya Pradesh chief minister Shivraj Singh Chouhan chuan player zawng zawngte hi Rs nuai 31 ṭheuh an pek tur thu a sawi.

Tokyo Olympic-ah khan Lalremsiami Hmar telna India hockey team hian semifinal an thleng, pathumna inchuhna inkhelah Great Britain ngam loin palina dinhmun an luah - medal la lo mah se an thlen chin hi India hmeichhe hockey tan chuan an thlen san ber ṭum a ni phak tho.

Chouhan chuan, "Kan nulate an chak lo a ni mai thei, kan thinlungah erawh hnehna an chang. Keini sorkar chuan player zawng zawng hnenah Rs nuai 31 ṭheuh kan pe ang, engtik niah emaw chuan an la hlawhtlin ngei pawh ka beisei," tiin a sawi.