Croatian club tana khel tur Jhingan

Indian defender ṭha mi Sandesh Jhingan chuan European top flight club tan a khel dawn a, ATK Mohun Bagan chhuahsanin Croatian club HNK Sibenik a zawm dawn - a contract rei zawng tur erawh tarlan a ni lo thung.

Kum 28 mi Jhingan hian European football khelh duhin kum hnih chhung chu a lo thlithlai tawh a, mahse, hliamin a tlak buak vang leh Covid-19 avangin a beiseina hi a hlawhtling thei lawk lo.

September 2020-a Bagan a zawm pawh khan kum nga chhung atan contract ziak mah se European club-in an duh a nih chuan Kolkata club hian a kawng an dal loh tur thu an ziak tel a, an inrem sa thlap.

Tun nipui transfer-ah Croatia, Austria leh Greece aṭangin Jhingan-a'n sawmna a hmu ta a, uluk taka a ngaihtuah hnuah Croatia lama kal chu ṭha berah a ngai ta a ni.

Madrid khawpuia hmunpui nei, Best of You Sports hnuaia Jhingan-a agent Anuj Kichlu chuan, "HNK Šibenik nen inremna kan nei vek tawh a, tunah chuan a rang thei ang bera Croatia-a a kal theih dan tur kan ngaihtuah ang," a ti.

Kichlu chuan sawi zawmin, "Nikum lamah pawh khan European club aṭangin sawmna a hmu nual a, mahse, Covid-19 vangin duh anga thil kalpui hleihtheih a ni lo. Kuminah hian min dawrtu club pali an awm a, Sibenik hi kan thlang ta a ni.

"Min sawmtu club-te league khelhna thlenga kan thlirin Sibenik hi a ṭha bera kan ngaih a ni a, Croatia hi World Cup final hial thleng an nih bakah an league hian hma a sawn nasa em em a ni," tiin Croatian club an thlan chhan a sawi.

Croatian journalist Adriano Savalli chuan HNK Šibenik leh Jhingan te inrem thu hi a sawi ve bawk. Barcelona midfielder hlui Mario Rosas enkawlna hnuaia khel Šibenik hi tun season-a league match li khelh tawhah vawi thum an tlawm tawh a, vawi khat draw result an nei.

Club 10 inelna Croatian First Football League-ah hian season hmasa khan parukna an ni a, team 10 hi season tluanin vawi li an inkhel kual a, season khatah league match 36 an khel ṭhin.

Sibenik hian tlarhnung laiah Austrian defender Stefan Peric leh Croatian defender Karlo Bilic chu rinrawlah an nei a, Indian defender Jhingan tan hmun chan a awlsam lo ang.

India tana vawi 40 inlan tawh Jhingan hian Bhaichung Bhutia club United Sikkim aṭangin a career a ṭan a, Mumbai FC tana a khelh leh hnuin kum 2014 khan Kerala Blasters a zawm.

Indian Super League-ah a hming chherin Sporting Goa, DSK Shivajians leh Bengaluru FC-ah te loan-in a khel bawk a, season hmasa khan Bagan hi a zawm a ni.

Kum 2014 khan ISL leh AIFF Emerging Player of the Season-ah thlan ve ve a ni a, season hmasa khan AIFF Player of the Year-ah thlan a ni thung - India infiammite chawimawina sang Arjuna Award a dawng tawh bawk.