Mahuma Memorial champion Chanmarians

Tualchhung cricket inelna ngaihhlut 1st Division Mahuma Memorial Tournament chu hripui leng vangin khelh zawh theih a ni lo a, match an khelh hman china sang ber Chanmarians chu champion a puan an ni.

Suaka Cricket Ground-a inelna neih hi hri leng thawh hnihna vangin hun rei tak a khaihlak. Tournament Committee ruahman angin inelna hi tihtawp niin, champion bakah division hniam lama tla an ti chiang nghal bawk.

Team pathumin point 12 an nei a, mahse Chanmarians hian point hmuh inzatah Chhinga Veng leh Ramhlun Venglai aiin Net Run Rate an nei ṭha zawk. Durtlang, Zemabawk Pitchers, Armed Veng leh Bawngkawn South te chu an tla thung.

Champion Chanmarians secretary R Malsawma chuan, "Hri leng avangin team pahnih hmachhawn hman loin kan chawlh a ngai ta si, a pawi kan ti hle. Table hmahruaitu nih vanga champion a min puang hi kan lawm takzet.

"Player leh coaching staff-te thawhrah hi ropui kan tiin hruaitute pawh kan in lungrual a, khawtlang thlengin kan thawhhona a ṭha hle. Pathian min hruainaah kan lawm hle, kan sponsor Ayush chungah pawh lawmthu kan sawi," tiin Vanglaini a hrilh.

Chanmarians hian tualchhung cricket inelna hrang hrangah hlawhtlinna an lo chang tawh ṭhin. Inelna lian Mahuma Memorial bikah chuan an vawi hnih champion tlinna chiah a ni thung.

Mahuma Memorial bikah hian match tina a chak zawk lamin Rs 20,000 an dawng a, a chak lo lamin Rs 15,000 an dawng thung. Match an khelh zawh theih loh chin erawh lawmman hi team pahnihin 50-50 in an insem a ni.