Pacman-a'n Yordenis Ugas a hmachhawn dawn

Boxer piang tawh zinga ropui ber ang hiala tam takin an ngaih Manny Pacquiao chu WBC leh IBF welterweight champion Errol Spence Jr nen inhnek tura tih ni mah se Spence Jr a inhliam a, a aiah Yordenis Ugas nen an inhnek dawn.

Division pariata world champion ni thei Pacquiao hi American boxer Spence Jr nen hian August 21-a inhnek tura tih an ni a, mahse, Spence Jr inhliam vangin Las Vegas khawpuiah Pacaman-a hmachhawn tur an thlak.

Kum 31 mi Spence Jr chuan, "Fight hmachhawn châk hle mah ila ka mit dinhmun thlirin inhnek lui chi ka ni lo," a ti a, Spence-a mit hi zai a ni zui dawn a ni.

Pacman-a khingpui tur ni ta Ugas hian September khan Abel Ramos hnehin WBA regular welterweight title a hlawh chhuak a, a hnuah WBA super champion dinhmunah an hlangkai.

Kum 42 mi Pacman hian July 2019 khan Keith Thurman hnehin WBA welterweight title a hlawh chhuak a, hemi hnuah a inlan leh tawh loh avangin a title hi hlihsak a ni a, Ugas hi hlan a ni.

Cuban boxer Ugas hi Las Vegas-ah hian 'undercard' a inhnek tura tih a ni sa a, a title chu Fabian Maidana laka hum tum tura tih a ni. Mahse, Spence-a inhliam a zarah fight lian zawk a hmachhawn thei dawn.

Pacman chuan, "A hmasa berah chuan Spence-a'n ngai a awh leh theih nana min ṭawngṭaipui turin ka sawm che u a ni. Hliam na zawk a tawrh hmaa a mit hliam hmuhchhuah a ni hi a lawmawm ka ti takzet.

"WBA super welterweight title hlawh tura Ugas hmachhawn ka remti a, title hlawhchhuah theih dan ṭha ber chu ring chhunga in fight mai hi a ni," a ti a, a inpeih tawh thu a sawi.