Nadal a inhnukdawk

Rafael Nadal chu Canadian Open khelh tur aṭangin a inhnukdawk leh hnuhnawh. Spanish tlangval hian inelna a hmachhawn tur thu lo sawi zet tawh mah se, a ke vei lam hliam a la dam fel theih loh avangin chawpchilh takin a inhnukdawk a ni.

Kum 35 mi Nadal hi Wimbledon leh Tokyo 2020 aṭangin a lo inhnukdawk tawh, kar hmasa khan Citi Open lamah inla mah se last 16 pawh a paltlang thei lo - tuna a lan dan chuan US Open atan duhthusama inbuatsaihna ṭha a nei dawn lo niin a lang.

Grand Slam vawi 20 champion tawh Nadal chuan, "Hun rei tak chhung chu hliam hian min tibuai ve tawh, tun dinhmunah chuan loh theih lohna vangin ka chawlh a ngai. Duhthlan tur dang ka nei loh avangin min hriatthiam a ngai.

"Nuamti taka tennis khelh hi a pawimawh a, ke na chung hi chuan nuamti takin ka inkhel thei dawn lo," a ti. Nadal hian tun hmain US Open nomawi hi vawi li a lo chawi tawh a ni. Season hmasa erawh hripui leng vangin New York khawpuiah a inkhel thei ta lo thung.

Nadal a inhnuhdawh lai hian Danill Medvedev erawh a inlan. Russian tlangval hian kum 2019 hnua a vawi khat nan ATP Masters 1000 final luh a tum leh mek a, a match hmasa berah Alexander Bublik chu 4-6, 6-3, 6-4 in a hneh nghal.

Champion beisei awm zinga mi Stefanos Tsitsipas pawhin hnehna a chang. Greek star hian a khingpui Ugo Humbert chu 6-3, 6-7, 6-1 in a lo hneh ve bawk a, an intawn hnuhnung pahniha a ngam loh a hneh tak avangin inrintawkna a neih belh ang.