Midang chunga leng Tai Tzu-ying

Yonex All England Open hmeichhe inelna lamah chuan Tai Tzu-ying hming bawk lam rik a ngai leh ta. Tzu-ying hian season hmasa final-a a ngam loh Chen Yufei  chu 17-21, 17-21 a hneh letin nomawi a la leh ta a ni.

Chinese Taipei nula hian 2017 leh 2018 khan hlawhtlinna a lo chang tawh bawk, tun hnai season li chhung chu final khel vekin ṭum thum a champion thei. Player dang chuh buai phak lohin Birmingham-a inelna roreltu a ni chiang hle.

Kum 25 mi Tai Tzu-ying chuan, "Chen nen hian vawi tam tak kan inkhel tawh, a ṭhat zia hre chiangtu ka ni. Tun ṭumah pawh khan kan inkhel tawk hle, game lak dawn hnaiah a vannei zawka ka ṭang hlauh ṭhin kha a lawmawm takzet.

"Ka khingpui khan na takin min nawr ṭhin mah se ka chiai duh lo, tournament ka ngaihhlut takah hian tawnhriat ka neih hnem tawh avangin khawng takin ka ding ngam a ni," a ti. Tai Tzu-ying hian coronavirus vanga tournament dang an khel zui thei lo tur chu pawi a tih thu a sawi ve bawk.

All England Open 2020-ah hian Indian player langsar ho pawh an inlan a, world number 1 hlui Saina Nehwal leh Kidambi Stkanth ten second round an paltlang lo; a thleng sang ber Rio Olympic silver medalist PV Sindhu pawh quarterfinal-ah a tla a ni.