Rangers tan Champions League beiseina a tawp

Steven Gerrard hoin Rangers chuan Champions League khelh ngei tum mah se hma takah an beiseina chu tihtawpin a awm a, Malmo ngam loin European football-a club inelna sang ber hi an khel dawn ta lo.

Rangers hian first leg-ah Malmo hi 2-1 in an lo ngam lo tawh a, second leg khelh tur an la neih avangin Steven Gerrard-a'n beiseina an la neih thu a sawi.

Mahse, mahni mualah pawh Rangers an chak zo lo a, Malmo lakah 2-1 in an tlawm nawn - inkhel pahnih belhkhawmah 4-2 in an tlawm a, Europa League playoff khel turin an tla thla.

Beiseina
Rangers-in Malmo an lehthal theih chuan playoff an lut ang a, Champions League group stage khelhna chance a hnai kuar dawn tih an hria - Gerrard pawhin hei hi a hria a, fan-te chu stadium khata an punkhawm theih chuan player-teah phurna nasa tak a siam tur thu thlengin a sawi.

Gerrard-a beiseina fans lamin an chhanglet a, March 2020 hnua a vawi khat nan Ibrox Stadium khat tlatin fans an pungkhawm a, Alfredo Morelos chuan minute 18-naah fan-te hi an duh zawng pein goal hmahruai a khung nghal - thawm chu ring tak a ni.

First half hun pek belhah Rangers duh angin thil a thleng zui - Malmo midfielder Bonke Innocent leh Rangers player Connor Goldson ten an ke khai kang chungin ball an inchuh a, Goldson zawk a tluk avangin referee-in Innocent hi a yellow card pahnihna a pe a, a hnawt chhuak.

A thlawn mai maw
Rangers-in 1-0 in hma an hruai a, player pakhatin an tam zawk bawk - goal khat dang an khung leh chuan an tlang thei a, an dinhmun a ṭha takzet.

Mahse, first leg ang thoin Rangers-in beisei an phak lo zui. Croatian striker Antonio Colak chuan minute 53 leh 57-naah Malmo tan goal a rawn khung a, Ibrox thawm chu reh tak a ni.

Hun tawp thlengin goal dang a lut lo zui a, Rangers an tlawm a, Champions League playoff khelh tum khan Europa League playoff an khel dawn ta zawk.

Gerrard a chuai?
Rangers tan Nigerian midfielder Joe Aribo-a'n a chance neih vawi hnih a chhawr thei lo a, second half ṭantira a chance neih kha Morelos-a'n khung ngat se result a danglam ngei bawk ang.

Mahse, Rangers vanneih zan a ni lo a, 'ta se...' tia sawi bak tih theih an nei lo. May 2015 hnua a vawi khat nan Scottish champion hi a zawnin vawi thum an tlawm ta a, hmanni lawka fakna tinreng dawngtu Gerrard tan a team siam thar a pawimawh.

Rangers hian first leg-a Malmo an hneh loh hnu khan league-ah Dundee United chu 1-0 in an ngam lo a, Malmo lakah an tlawm nawn leh ta bawk - Gerrard-a hnathawh zel dan tur hi hmuh a châkawm ta hle.

Hmabak
Rangers-in league match hnih an khelh tawhah vawi khat hnehna changin vawi khat an tlawm a, season hmasaa tlawm nei loa an champion kha chu an chhunzawm thei dawn lo tih a chiang tawh.

August 13 zanah Rangers an inlan leh dawn a, dar 12:00-ah Scottish Championship club Dunfermline Athletic nen an inkhelh dawn avangin chak tura ngaih an ni. League erawh August 21-ah an khel leh dawn chauh a, Ross County khelmualah an zin ang.

Ross an lenchilh hma hian Rangers-in Europe-a an awm dan tur chu an hre fel hman dawn a, August 19 zanah Kazakhstan club Kairat Almaty leh Armenian club Alashkert inkhela chak zawk chu Europa League playoff-ah an hmachhawn dawn a ni.

Minute 45 chhung chu kan khel ṭha a, mahse, kan inkhel pahnihah second half kan tihchhiat ve ve avangin kan tuar ta a ni. Second half-ah player 10 lek kan hmachhawn chunga kan tlawm kha ka hrethiam lo. 1-0 a nih hnuah 2-1 in kan hnufual a, hlauhthawnnain kan khat tawh a ni. Second half-ah kan chesual a, mawhpuh tur bik erawh an awm chuang lo. Match li kan khelhah vawi thum kan tlawm ta a, Rangers-ah chuan result ṭha a ni lo. - Steven Gerrard, Rangers manager