Sergio Ramos a chawl rih dawn

Sergio Ramos chuan beisei angin Paris Saint-Germain tan a khel nghal mai dawn lo. Spanish defender hi tihrawl na vangin thla hnih chhung vel a chawlh a ngai dawn tih a chiang tawh.

Season hmasa khan Ramos hi hliam vangin a lo buai tawh, match a khelh tlem avangin Spain tan Euro 2020 khel tura koh pawh a ni lo. Nipui bazarah PSG a zawm a, Ligue 1 club tan hian league match hmasa ber pawh a khel thei lo nghal a ni.

Kum 2021 bikah Ramos hian match nga chiah a la khel, kum 35 mi defender hi hliam vangin a football hun a zuih tawh mai ang em tih chu zawhna lian tlak a tling ta.

PSG hian Champions League nomawi duh vangin player an lakhawm nasa, defender Ramos hi an mamawh tak pawh a ni. Chutih rualin tlarhnung laiah Presnel Kimpembe leh Marquinhos te nen khelhna hmun an inchuh ang.

Real Madrid tana UCL nomawi vawi li chawi tawh Ramos hi a dam ṭha a nih phawt chuan rinrawl ni tura ngaih a ni, tawnhriat a neih ṭhat bakah a huaisenna hi player dangte tan thlamuanpui tham a ni.