Lionel Messi hlimthla

Jorge Messi leh Celia Maria Cuccittini te fa pali zinga pathumna ni turin Lionel Messi hi June 24, 1987 khan Rosario, Argentina-ah a piang. Messi unaute hi mipa pahnih Rodrigo leh Matias bakah hmeichhia Maria Sol te an ni. Messi hian kum li mi a nihin Grandoli club tan a khel ṭan a, a pa Jorge chu an coach a ni.

Messi hian kum ruk mi a nihin an khaw club Newell's Old Boys a zawm a, 'The Machine of '87' zingah a la thiam fal cheu. Diego Maradona pawh kha Newell's Old Boys tan hian a khel tawh a, an junior team tan Messi hian goal 500 dawn khung. First team inkhelh ṭumah halftime laiin hmuhnawm khawpin ball a khal kual thei tawh!

Messi hian a pi Celia Oliveira Cuccittini a ngaina hle. Celia hian Messi hi a naupan laiin Grandoli (naupan lai club) ah a hruai ṭhin. Chutah chuan mual sir aṭangin, "Lionel kha ball pe rawh u, goal a khung thei a nia," tiin a lo au ṭhin. Celia hi May 4, 1998 khan alzheimer vangin a thi. Kum 11 mi Messi hian a pi thi hi a tuar em em a, a taksa peng lak bo ang mai a ni a, a kuang bula a ṭap phei chu a chhungte tana hmuh hrehawm khawp a tling. Celia hian a vullai hun a hmu hman lo a, Messi erawh a pi hriat reng nan goal a khung apiangin van lam a kawk ṭhin.

Messi kuahtu hi Carles Rexach a ni a, Barcelona winger hlui hi tunah chuan kum 74 mi a ni tawh. Amah hi awm lo se chuan khawvelin Messi a hmu kher lo ang. December 14, 2000 khan Rexach hriatpuinain Messi chuan Barcelona tana a contract hmasa ber chu rawmawl (napkin) ah a ziak.

Messi hi kum 10 a nihin growth hormone a tlachham tih hriat chhuah a ni a, enkawl man hi thla khatah $1,000 a ni. A pa Jorge-a health insurance chuan kum hnih chauh a daih a, Newell's Old Boys-in puih inhuam mah se an phatsan. Buenos Aires club River Plate pawhin Messi theihna hi hmu mah se Argentina ram sum lama an tlakchhiat lai a nih avang an tlin bik lo. Chuta lo rawn lang chu Barcelona hi an ni a, Catalan club hian 'risk' an la. Messi hi Class of 1987 zinga mi a ni a, he batch-ah hian Gerard Pique leh Cesc Fabregas te pawh an tel a ni.

November 16, 2003 khan Frank Rijkaard chuan kum 16 mi Messi chu a vawi khat nan Barcelona tan a khelhtir a, hemi ṭum hian friendly match-ah Jose Mourinho enkawl FC Porto an hmachhawn. Messi hian kum 17 mi a nihin Barcelona tana official match hmasa ber a khel a, October 16, 2004 khan Espanyol nen an inkhelh ṭumin minute 82-naah Deco a thlak. Kum 17, thla thum leh ni 22 mi a ni a, an khingpuiah hian PSG-a amah enkawltu tur Mauricio Pochettino (centre back) hi a khel thung.

May 1, 2005 khan Messi chuan Ronaldinho siamsak chu Albacete lamah a khung a, Barcelona tana a goal hmasa ber a ni.

Messi leh nomawi : Messi hian Barcelona hi nomawi 35 a chawipui. Chungte chu La Liga (10), Super Cup (8), Copa de Rey (7), Champions League (4), UEFA Super Cup (3) leh Club World Cup (3) te a tel. Mimal lawmman lamah pawh Pichichi Trophy vawi riat, Ballon d’Or leh La Liga Best Player vawi ruk te chu a langsar an ni.

May 27, 2009 khan Messi-a'n Champions League final-ah Manchester United lakah a tauh goal a, a vawi hnih nan UCL nomawi a chawi. Hemi season hian Pep Guardiola-a'n Barca enkawl ṭanin Ronaldinho a chhuahtir avangin Messi hi Andres Iniesta leh Xavi Hernandez te nen Catalan club innghahna an ni a; UCL, La Liga leh Copa del Rey-ah an champion.

March 10, 2007 khan Messi-a'n Barcelona tana hattrick hmasa ber a siam a, Real Madrid lakah goal thum khungin 3-3 in an inhnehtawk.

March 8, 2017 khan Barca chuan khualmuala 4-0 an hneh loh PSG chu an mual Nou Camp-ah 6-1 in an hneh let. Hemi ṭuma Messi thlalak hi infiamna khawvela thlalak ropui zinga chhiar tel a ni a, Catalan club player pawimawh Messi leh Neymar te hi tunah chuan PSG player an ni ta.

August 8, Pathianni khan Messi chuan Nou Camp aṭangin Barcelona thlahna thu a sawi a, a insum zo lo - patling a ṭap.