Lungtileng - Nghilh har match hmasa!

European football season an ṭan hnai a, nipui transfer-ah ṭum dang ang thoin thawm lian tak tak hriat tur a awm nual - a bik takin Lionel Messi boruak a lian takzet a, football mai ni lo infiamna khawvel chuan Argentina captain-in Barcelona aṭanga PSG a zawm lai chanchin hi ring fan awk awkin an ngaihven a ni.

Chutiang boruak karah chuan ṭum dang ang bawkin Premier League chanchin pawhin ngaihven a hlawh a, transfer bazar titi ngaihnawm a tling a, fans ṭhenkhat lawma an zuan tawr tawr laiin ṭhenkhat erawh transfer bazar tawp hma chu hlauthawngin an awm a!

Manchester City-in British record siama pound maktaduai 100-a Jack Grealish an lakluh te, Manchester United-in pound maktaduai 73 zeta Jadon Sancho an lei te, Raphael Varane-a'n Old Trafford a pante chu transfer langsar zual an ni.

Heng player langsar tak takte hian kartawp a thleng ang a, an club thar tan Premier League-a an match hmasa ber an khel hlawm dawn - eng tak ang hlawm ang maw? tiin zawhna a lo piang a, rilruah player man to, Premier League an match hmasa bera ropui tak che nghalte an lang lo thei lo.

Alan Shearer (Blackburn Rovers)
British striker piang tawh zinga ropui ber ang hiala tam takin an ngaih Shearer hian kum 1992 khan hetihlaia British record transfer fee-in Southampton a zawm a, a man zat hi pound maktaduai 3.3 a ni! Mahse, Crystal Palace nena an match hmasa berah Shearer hian goal hnih a khung nghal a, August 15, 1992-a inkhelah hian 3-3 a inhnehtawkin a teama chakpui zo lo thung.

Blackburn tana season hmasa berah league match 21 khelin goal 16 a khung nghal a, 1994-95 season-ah phei chuan league match 42-ah goal 34 khungin league-ah a team a champion pui a, Blackburn tan inelna hrang hrangah match 171 khelin goal 130 a khungsak hman. Kum 1996 khan Blackburn hi chhuahsanin a hunlaia player man to ber ni turin Newcastle United chu pound maktaduai 15-in a zawm a, a seilenna khaw club tan inelna hrang hrangah match 405 zet khelin goal 206 khung mah se nomawi chawipui erawh a nei lo.

Sergio Aguero (Manchester City)
August 15, 2011 khan Manchester City player awm tawh zinga ropui ber ang hial tam takin an ngaih Sergio Aguero chuan City tana a match hmasa ber a khel a, hriatreng tawh tur sulhnu a hnutchhiah nghal. He inkhelah hian City chuan 4-0 ngawtin Swansea City an sawp a, Atletico Madrid aṭanga pound maktaduai 35-a City zawmtu hi minute 59-naah bench aṭanga luhtir a ni a, a club thar tana a goal hmasa ber khung turin minute kua bak hun a mamawh lo.

Aguero hian David Silva goal khung tur a siamsak bawk - kum 10 a liam leh meuh erawh chuan Barcelona player a ni ta a, Premier League player ropui ber pawl niin City a mangṭha. Manchester khaw club tan hian Premier League-ah match 275 khelin goal 184 a khungsak a, assist vawi 47 neiin league-ah vawi nga ngawt a champion pui a, golden boot vawi khat a hlawh chhuak bawk.

Anthony Martial (Manchester United)
September 2015 khan Man-chester United chuan khawvela rawlthar man to ber ni turin Anthony Martial chu AS Monaco aṭangin an lalut a, pound maktaduai 58 thlenga a man sang chho thei turin French striker hi an lei chhuak.

Martial-a'n September 12-ah a match hmasa ber khel nghalin Liverpool a hmachhawn a, player man to satliah a ni lo tih pholangin inkhel boruak sangah goal a khung nghal - Old Trafford thawm chu ring tak a ni.
Kum 25 mi ni ve tawh Martial hian United-a a season hmasa berah hian match 49 khelin goal 17 a khung nghal a, beisei ang erawhin a ropui zui lo - Red Devils tan inelna hrang hrangah match 258 khelin goal 78 a khung a, assist vawi 50 a nei. FA Cup (1), Europa League (1), League Cup (1) leh Community Shield (1) nomawi a chawi tawh chu United ang tan chuan chhuang taka sawi chi a ni lo. Season hmasaa United tana goal sarih chiah khungtu striker hian France national team-ah pawh hmun nghet a chang lo chhunzawm zel a, tunah hian Inter Milan chuan Chelsea pan tur Romelu Lukaku thlak turin pound maktaduai 50 a lakluh an tum nia sawi a ni.

Sadio Mane (Liverpool)
August 14, 2016 khan Sadio Mane-a'n Liverpool tana a match hmasa ber a khel a, 4-3 a Arsenal an hnehna inkhelah hian solo goal ropui khungin khawvelin Mane hming a theihnghilh tawh lo. Southampton aṭanga pound maktaduai 34-a Liverpool zawmtu hi a hunlai chuan African player man to ber a ni a, Reds tana goal 100 khung tling tura goal thum chauh a mamawh tawh avangin Liverpool-in an lei sual lo tih a chiang.

Kum 29 mi Mane hian Reds tan inelna hrang hrangah match 218 khela goal 97 khungin assist vawi 43 a nei a, Premier League leh Champions League nomawi a chawi tawh bawk. Liverpool legend anga hriat hlawh reng tawh tur Mane hi tun season-ah pawh Liverpool tan player pawimawh a ni leh dawn tih a chiang a, season hmasa kha 'a form tawk lo' tia sawisel ni mah se match 48-ah goal 16 a la khung cheu tih erawh hriat a ṭha.

Harry Maguire (Manchester United)
August 11, 2019 khan khawvela defender man to ber Harry Maguire chuan Red Devils tana a match hmasa ber a khel a, an elpui Chelsea chu 4-0 ngawtin an sawp. Pound maktaduai 80 man defender hian tlarhnungah United mamawh chhanna a ni tih pholangin Chelsea tlarhma a ti hrilhhai a, Leicester City aṭanga Old Trafford pantu defender hi a khel ṭha takzet.

Marcus Rashford-a'n goal hnih a khung avangin sawi hlawh zawk mah se Anthony Martial goal khungna tura Tammy Abraham ball ken lai chhuhsaka United goal nawr a puih dante chu hmuhnawm a tling a, khatihlaia Maguire inkhel entute khan a man phu loah an ngai kher lo ang. United Captain hial ni ta Maguire hian season hnih cham tawhin league match 72-ah goal thum a khung a, nomawi erawh a la chawi lo - a chhuahsan tak Leicester erawhin FA Cup leh Community Shield nomawi an chawi leh tawh a, United boss Ole Gunnar Solskjaer-a'n Varane nena an inkawpin nomawi an hlawhchhuahpui theih a beisei ang.

Tanguy Ndombele (Tottenham Hotspur)
Tottenham-in kum 2019 khan Lyon hnehnah pound maktaduai 53.8 an pe a, an club player man to ber ni turin Ndombele an lei chhuak - Spurs-in pound maktaduai 42-a Ajax aṭanga Davinson Sanchez an lo lei tawhna record chu a khum chiang hle.

Hetihlai hian Premier League fans tam zawkin Ndombele an la hre kher lo mai thei. Mahse, French midfielder hian August 10, 2019 khan a league match hmasa ber khelin Villa lakah goal ropui a khung. Ndombele hian Spurs tan inelna hrang hrangah match 75 khela goal riat khungin assist vawi riat a nei a, mahse, season hmasa khan coach Jose Mourinho nen an inhmuhthiam loh avangin a tlatlum lo hle. Euro 2020-a France squad-a tel phak lo Ndombele hi coach thar Nuno Espirito Santo hnuaiah intuaihriam thei tura ngaih a ni a, mahse, Arsenal nen pre-season an khelhah a in fit reng chunga khelhtir a nih loh avangin chhuah a tum anga sawi a ni.

Fabrizio Ravanelli (Middlesbrough)
Kum 1990 chhoa Boro-in ren miah loa sum an hman lai khan Nick Barmby, Juninho, Branco, Emerson leh Fabrizio Ravanelli te ho an lalut a, Italian striker Ravanelli-a'n a match hmasa bera hattrick a siam kha Boro fan-te chuan an theihnghilh tawh lo ang.

Juventus tana Champions League nomawi chawi hlim striker hian pound maktaduai sarihin Boro a zawm a, August 17, 1996 khan Liverpool laka a match hmasa ber khelin goal thum a khung nghal, 3-3 in an inhnehtawk. Hetihlaia Premier League player hlawh hnem ber Ravanelli hian league match 33-ah goal 16 a khung a, inelna hrang hrangah match 48 khelin goal 31 ngawt a khung bawk - heti chung hian Premier League aṭangin an relegate a, FA Cup leh League Cup final lut mah se Chelsea leh Leicester ngam loin pahnihna an ni bawk. Boro chhuahsanin Marseille a pan zui a, kum 2001 khan Premier League-ah kirin Derby County a zawm - Derby tan league match 31-ah goal kua khung mah se a relegate leh a, first division-ah season khat a khel zui.