Bayern hmaah Havertz

Zanin dar 7:00 hian Bayer Leverkusen-in champion lai Bayern Munich an mikhual dawn a, Bundesliga inkhel hi Kai Havertz vangin en a châkawm sawt. Bavarians hi champion turin an dinhmun a ṭha a, Leverkusen tan erawh Champions League khel turin point thum hlawhchhuah a ṭul hle.

Leverkusen hian an match hnuhnung berah Havertz goal hmangin SC Freiburg 1-0 in an hneh a, amaherawhchu Germany international hi hliam vangin minute nga inkhelh tur a la awmin an la chhuak. Real Madrid nen sawi zawm Havertz hi Bayern hmachhawn theih tura ngaih a ni a, kum 20 mi midfielder hi a inlan chuan a hmuhnawm sawt dawn. 

Bayern Munich-in Leverkusen, Borussia Monchengladbach, Werder Bremen, SC Freiburg leh Wolfsburg te an hmachhawn dawn. Hansi Flick hote hian champion turin vawi thum chak an la mamawh a, an elpuite hi la chesual thei bawk an nih avangin vawi thum chak kher a ṭul lo thei bawk.

Leverkusen erawhin point 56 an hmu a, palina Borussia Monchengladbach nen an point hmuh zat a inang. Bundesliga-ah goal difference a pawimawh a, Peter Bosz hote hi an chak ta lo a nih pawhin goal chhuah tam a thiang lo.

Bayern Munich tan chanchin ṭha hlir a la ni rih. Inelna ṭan leh hnuah match li khel tawhin an la chak vek a, an khel ṭha tel bawk. Tlarhma lamah Robert Lewandowski a awm a, Polish striker hian goal 29 khung tawhin Gerd Muller record khum theihna hun ṭha a nei. 

German football legend Gerd Muller hian 1971/72 season khan goal 40 a khung a, match nga khelh tur a la awm avangin Lewy-a tan record dinglai hi khum theih a la ni.

Bavarian hian player pawimawh Philippe Coutinho leh Niklas Sule te hliam vangin a la chhawr thei dawn lo a, Spanish midfielder Thiago a dam tawh thung. Barcelona midfielder hlui Thiago hi ball thiam leh fing a nih avangin Bayern khel a nung sawt tura ngaih a ni a; Leon Goretzka, Thomas Muller, Serge Gnabry leh Joshua Kimmich te an awm bawk avangin inrintawkna an ngah khawp ang.

Bayern Munich hian inrintawk takin Bayer Leverkusen an mikhual dawn a ni thei a, amaherawhchu Peter Bosz hote hian nikum December thla khan Allianz Arena luhchhuahin Bayern hi 2-1 in an hneh tih hriat a ṭha. Leverkusen hian league-ah a zawnin Bayern hi vawi hnih an hneh tawh a, tuna an hneh leh a nih chuan a vawi khat nan a zawnin vawi thum an hnehna tur a ni ang.

Leverkusen aṭanga hming pakhat lakchhuah tur a nih chuan Kai Havertz hming lamrik ngei a ṭul. Kum 20 mi Havertz hian Werder Bremen leh Champions League khel tura an elpui Gladbach an hneh ṭumin goal hnih a khung ve ve a, an match hnuhnung bera Freiburg lama goal a khung nen tun season-ah goal 11 a khung tawh.

Peter Bosz chhawr theih turin Havertz bakah Kevin Volland leh Lucas Alario te an awm a, chutihrualin Bayern an hmachhawn dawn miau avangin tlarhnung ven ṭhat a ṭul ang.