NBA khelh chhunzawmna tur Disney World Resort

Basketball inelna sang ber NBA season kal lai chu Disney World Resort, Florida-ah khelh chhunzawm an tum a, ruahman dan chuan July 31 aṭangin regular season an khel zui ang.

Covid-19 vangin March 11 aṭang khan NBA hi an chawl lailawk, North America ramah chuan infiamna lian zingah hripui leng vanga an chawlh laikawk hmasak ber a ni - season khar hun atan October 12 aia tlai lo ni se, tih chu club leh inelna buatsaihtu lam duhdan a ni.

Western Conference-a team 13 leh Eastern Conference-a team pakua ten playoff khelh an la beisei mek, playoff beiseina la nei team 22 chiah an inlan tawh ang. Regular season bik pawh match kua ṭheuh khelh hmabak an la nei; playoff leh NBA Finals in a zui a ngai bawk.

NBA lamin an ruahman dan chuan team zawng zawngte chu hmun khatah an awmkhawm ang, a khat tawkin coronavirus an kai em tih enfiah a ni 

ṭhin dawn. A hnuah entu an awm thei dawn lo a, TV lamah erawh pek chhuah a ni ang.

Ningani khan NBA board lam chuan ruahmanna hi an pawm tawh, a taka kalpui tur erawh chuan National Basketball Players Association (NBPA) lamin an la pawmpui leh phawt a ngai dawn, nizan khan thu chhuah an siam hman a rinawm.

Western Conference aṭangin Los Angeles Lakers chu playoff khel tura tling chiang tawh an ni a, Los Angeles Clippers, Denver Nuggets, Utah Jazz, Oklahoma City Thunder, Houston Rockets, Dallas Mavericks leh Memphis Grizzlies te chu a sang pariat china awm mek an ni bawk.

Milwaukee Bucks, Toronto Raptors leh Boston Celtics te chu Eastern Conference aṭanga playoof khel turin an tling tawh. Hmunruak panga la awm chu Miami Heat, Indiana Pacers, Philadelphia 76ers, Brooklyn Nets leh Orlando Magic ten an luah mek, an dinhmun erawh team dang lakah a la him bik lo.