Chelsea-in nomawi an chawi nghal

UEFA Super Cup-ah Champions League champion Chelsea chuan Nilaini zan khan Europa League champion Villarreal an hneh a, Thomas Tuchel-a hoten season thar atana an match hmasa berah nomawi an chawi nghal.

Windsor Park, Belfast-ah Blues-in Hakim Ziyech hmangin minute 27-naah hma an hruai a, Gerard Moreno hmangin Spanish club-in minute 73-naah an sut. Extra time-ah goal a luh belh lo a, penalty shootout-ah Kepa Arrizabalaga hoin Chelsea hi 6-5 in an chak.

Goal khat ve ve
Chelsea-in bul an ṭan ṭha a, friendly match-a che ṭha Hakim Ziyech-a'n inrintawkna a ngah tih a hriat. Villarreal keeper Sergio Asenjo-a'n Timo Werner goal khung tur a dansak a, N'Golo Kante erawhin a hun ṭha neih goal zawnah a pet thei lo thung.

Minute 27-naah Kai Havertz cross chu Ziyech-a'n goal-ah a chantir a, Chelsea-in 1-0 in hma a hruai. Yellow Submarine-in goal an chhuah hnuah an nawr na sawt.

Blues keeper Edouard Mendy-a'n Boulaye Dia goal khung tur a dansak a, Liverpool defender hlui Alberto Moreno volley-in crossbar a per dawp. Villarreal-in minute 73-naah siphurh an sut ta a, Gerard Moreno chuan Dia khenglet zeuh chu chiang zetin a pet lut. Goal dang hmuh tur a awm zui lo.

Thawnthu dang
League Cup 2019 final-ah khan Kepa chu Blues manager Maurizio Sarri-a'n thlak a tum a, a chhuak duh lo. Penalty shootout-ah Man City an vannei ta zawk.

Super Cup-ah erawh Tuchel-a'n penalty hmachhawn turin Kepa a luhtir a, Mendy a la chhuak. Blues tana pettu hmasa ber Kai Havertz-a'n khung lo mah se Kepa hian Aissa Mandi penalty pet a dang. Sudden death-ah Kepa bawk hian Raúl Albiol pet dan sakin Chelsea a chakpui a, Spain tana khel pha lo hi London club tan hero a ni.

Engtin zel?
Goal khungtu Ziyech chu dar (shoulder) hliam vangin minute 43-naah an tlak. Thomas Tuchel chuan, "First half-a player kan la chhuak a nih chuan a hliam na tihna a ni," tiin a sawi a, Blues-in player ṭha hi an chan dawn.

Chelsea-in August 14, Inrinni zan hian Crystal Palace an hmachhawn dawn a, Super Cup-ah an ṭhat dan berin an lut lo. Kum 26 mi Nathaniel Chalobah chuan tlarhnungah bul a ṭan a, a khelh danah Tuchel a lawm ang.

Italian player pahnih Jorginho leh Emerson ten history an siam a; kum khat chhungin UEFA Champions League, European Championship leh Super Cup nomawi an chawi vek. Jorginho phei chu final-ah hian an inlan vek a ni.

Player inlante
Chelsea: Mendy (Kepa 119'); Zouma (Christensen 66'), Chalobah, Rüdiger; Hudson-Odoi (Azpilicueta 82'), Kanté (Jorginho 65'), Kovačić, Alonso; Havertz, Ziyech (Pulisić 43'); Werner (Mount 65')
Villarreal: Asenjo; Foyth, Albiol, Pau Torres, Pedraza (Estupinán 58'); Pino (Mandi 91'), Trigueros (Moi Gómez 70'), Capoue (Mario Gaspar 70'), Alberto Moreno (Morlanes 85'); Gerard Moreno, Dia (Raba 86')

Kan inbuatsaih ṭha a, statistic aṭanga thlir chuan Kepa hi penalty save turin a ṭha tih kan hria. Thil awm dan kan sawiin Mendy pawhin a pawm thlap. - Thomas Tuchel, Chelsea manager

Villarreal leh La Liga aiawha ka tel hi ka inchhuang. Player-te kan dem thei lo ang, a chhan chu an theihna zawng zawng an chhuah. - Unai Emery, Villarreal manager