Zaninah Premier League an ṭan dawn

Mizo tena kan en tam, an khelh hun bi leh kan khawsak dan a inmil - TV lamah duhthusama en tur a awm avangin Premier League hi kan ngaina. EPL an chawlh lai chuan khua a har hman ṭhin, zanin dar 12:30 aṭangin 2021-22 season chu khelh ṭan a ni leh dawn ta.

Arsenal chuan kai thar Brentford an lenchilh dawn. Mikel Arteta-a'n 'Arsenal Thar' din a tum chu eng ang tak nge an nih kan hmu dawn a, kum 75 hnua EPL khel leh tur lakah an chak lo a nih chuan an hmabak a hautak chhunzawm ang - match hnihnaah Manchester City an tum dawn.

An phur
Pound maktaduai 50 sengin Ben White an lalut a, England international defender hian David Luiz hmunruak a luah khat thei tura ngaih a ni. Arteta-a'n an academy chhuak Bukayo Saka leh Emile Smith Rowe te chungah rinna a nghat ngam, kan hmel kan hmuh tam a rinawm.

Nicolas Pepe-a'n pre season a hmang ṭha, pound maktaduai 72 man forward hi a khelh ṭhat aiin khelh ṭhat loh ni a tam ṭhin avangin rin thiam a harsa. Captain Pierre-Emerick Aubameyang-a'n goal khung a chhunzawm leh tawh chuan harsatna ṭhenkhat a kiang ang.

Arteta chuan, "Filawr taka kal a, tluk chang neih leh si chuan a fuh lo. Hnehna changtu ni tur chuan ngelnghet taka kal theih a ngai, chutiang tur chuan team pawh kan inbuatsaih. Inbuatsaihna a ṭhat bakah ka naute rilru puthmang a dik avangin beisei pawh kan nei.

"Auba pawhin hun harsa a hmang, midang tan pawh season hmasa kha chu a harsa. Tunah erawh a rilru a danglam tawh, theihna sang tak a neih ang ngeiin tun hma lama a sulhnu ang kha kan hmuh leh ka beisei," tiin a sawi.

Gunners an phur a, mahse am midfielder Thomas Partey erawh hliam vangin an chhawr thei dawn lo. Midfield kaikhawm turin Granit Xhaka an rin leh a la ngai dawn, Martin Odegaard leh Dani Ceballos te an awm tawh loh avangin Smith Rowe chungah mawhphurhna a sang dawn.

An zam lo
Kai thar mai an ni a, an tan boruak thar hlak a ni dawn. Brentford manager Thomas Frank erawh a zam lo, season hmasa Championhsip lama an khelh tawh ang bawkin attacking football hmuhnawm an khelh tur thu a sawi.

Championship-ah pathumna an ni a, mahse goal 79 an khung miau avangin Brentford aia khung hnem an awm lo. Bees manager Dane chuan, "Kum 75 hnua a vawi khat nan Premier League kan khel ṭan dawn, kan thiam dan takin kan khel ang.

"Team dangin engtiangin nge an khelh tih ai chuan keimahni lam kan in ngaihtuah a ngai. Keini chu goal khung nuamti leh thiam kan ni, chutiang tur chuan ka naute pawh ka chher," a ti, an mikhual Arsenal lakah goal khung a tum hle.

Brentford hian striker goal khung thei tak Ivan Toney an nei. English player hian season hmasa khan league match 45 aṭangin goal 31 a khung thei, ani ven hi Gunners tlarhnung tan pawh hna pawimawh a ni dawn, an veng seng lo mai thei.

Dane chuan, "Ivan Toney hian Premier League min kai pui a tum, chu chu a hlen tawh. Tunah chuan EPL-a goal khung a tum leh tawh, a tih hlawhtlin leh ngei pawh ka ring, ti hlawhtling turin theihna pawh a nei," tiin a striker penalty pet thiam lakah beisei a nei sang hle.