Italy-in hma an sawn

Football thuneitu sang ber FIFA chuan nimin khan world ranking thar a ti chhuak. Euro champion leh Copa America champion ten hma sawn mah se a chung berah Belgium an la awm chhunzawm.

Italy chuan ram pahnih kal kanin pangana dinhmun an luah. Lionel Messi hoa Copa champion Argentina pawh Italy ang bawkin pahnihin hma an sawn a, parukna dinhmun an luah thung.

Copa America final-a chak lo zawk Brazil chu pahnihna an ni. Gold Cup champion United States chuan team 10 ngawt kal kanin a sang zual 10 zingah an inhlangkai a, basketball leh baseball chauh lo pawh an thiam tih a lang zel.

A sang zual 10 a lang phak zingah France, Spain leh Portugal te chu an hnungtawlh vek.

India chuan point 1180 hmuin 105-na a ni a, a dinhmun ngaiah a ding. Mizoram ṭhenawma awm Myanmar chuan point 1057 hmuin 145-na an ni ve bawk.