Sawi nin theih loh Lionel Messi

Paris Saint-Germain-in Lionel Messi an lalut fel a, Argentina captain thawm hi a reh mai lo. Khelmual pawn lamah nghawng nasa tak a neih miau avangin khawthlang media-te chuan uar takin an la ziak zel.

Sum hlawm
Barcelona-in sum lama harsatna an tawh avangin Messi an chelh theih lo a, PSG erawhin an hlawkpui thung. French club hian Messi kawr an hralhna aṭangin sum ṭhahnem tak an lalut dawn.

Jersey hi chi hnihin an ṭhen a, pakhat chu 'stadium shirt' niin a dang leh chu 'player shirt' a ni. Stadium shirt hi €115 (Rs 10,019.84) a ni a, Messi hming, number 30 bakah Ligue emaw UCL badge emaw a awm ang.

Player shirt hi chu €165 (Rs 14,376.29) daih a ni thung ang a, player hak ṭhin ang pangngai a ni. Chutihrualin hei chu 'official PSG shop' a an zawrh dan a ni a, India ramah chuan hetiang tlukpui thuak hi man tlawm zawkin a awm thei thung ang.

Heti taka jersey pakhat man a to chung hian minute 30 chhung lekin club online store-a mi chu an hralh zo nghal vek. Barcelona jersey Messi hming chuanna leh no. 10 chu ṭhahnem tak an print hman a, a tihral lam erawh Nike lam chan a ni.

Catalan club hian Messi kawr hralhna man aṭang hian season khatah euro maktaduai 20-30 vel an lalut ṭhin a; player ṭha bik, an club tana la khel duh a thlawna an chhuahtir hi an ui khawp ang. Chutihrualin La Liga salary cap vangin an chelh thei lo thung.

A nghawng a lian
Messi vangin PSG ngaihventu a letin an pung. July thla khan instagram-a PSG-in follower a neih belh zat chu maktaduai 1.34+ a ni a, Messi an lakluh chiah chuan August thlaa follower an neih belh zat chu maktaduai 5.8+ a ni daih.

PSG leh Messi inremna sum kha a tam tham a, ziah dan inang lo fur mah se chhiah pek zawhah euro maktaduai 35 a hlawh dawn tih chu a rintlak zinga mi a ni. Chumi awmzia chu Messi hian thla khatah euro maktaduai 2.9 hlawh dawn tihna a ni a, kar khatah €729,000 a hlawh dawn.

Hei chauh hi a ni lo, contract-ah hian thu dek kilh (clause) neuh neuh a la awm. Chutah chuan Argentina chungchang pawh ziah tel a ni a, La Albiceleste-in official emaw friendly match emaw an nei a nih chuan ngaih pawimawh a ni zawk ang, tih a awm.

Argentina staff-te pawhin PSG hmun hi an tlawh thei dawn a, French club-ah hian Messi bakah Argentina player pathum Angel Di Maria, Leandro Paredes leh Mauro Icardi te an awm a ni.