Hmasawn theih ka inring - Rossi

MotoGP a chawlhsan tur thu a sawi chiang tawh a, tun season hman lai chu Valentino Rossi-a'n a ṭha thei ang bera hman zawh a duh - tun kar tawpa intlansiak an neih turah pawh a hmasa lam aia hmasawn theih ngei a inbeisei.

Inelna hnuhnung Styrian MotoGP-ah khan Rossi hian bul a ṭan fuh lo hle a, a tir lamah phei chuan 19-na dinhmunah a awm hial. Mahse, intlansiak a zawh meuh chuan 13-na a ni a, hmasawn viau angin lang mah se rider ṭha dangte a phak lo hle.

Italian rider Rossi chuan, "Inelnaah chuan a bul ṭan fuh hi a pawimawh hle, lap hmasa bera kan tlahniam a nih hi chuan thawh chhuah leh pawh a harsa tawh ṭhin. Kan insiamṭhat chhungin midang umphak a harsa tawh.

"Tlan kawng hi Yamaha tan chuan duhthusam a ni lo, zep theih pawh a ni lo. Mahse, a hmun ngaiah inelna kan hmachhawn leh dawn a ni a, chhuanlam siam erawh a rem lo ang, a tir aṭangin a ṭha thei ang bera tlan a ngai tihna a nimai," a ti.

Bike intlansiakna sang ber season kal laiah Rossi hian point 20 chauh a la hmu a, table-ah 19-na a ni. Hmahruaitu Fabio Quartararo-a'n point 172 zet a neih tawh avangin Rossi tan title beisei ngam a ni tawh lo, a sang thei ang bera a hun tawp hman erawh a tum ang.