Svitolina hnehtu Johanna Konta

Canadian Open khelh laiah Johanna Konta chuan seeded pathumna Elina Svitolina hnehin last 16 a inhlang kai. Inkhel dangah hliam damkawr Simona Halep chu beisei phak loin a zinkawng a tawp nghal ve bawk.

Nimin zing inkhelah Konta hian Ukrainian nula lakah hian 3-6, 6-3, 6-2 in hnehna a chang a, a match lehpekah chuan tleirawl duhawm Coco Gauff a hmachhawn leh ang, inkhel awlsam a ni lo ang.

Britain number 1 Konta chuan, "Svitolina nen hian tun hmain kan inkhel fo tawh, ka la chak ngai lo. Tunah erawh hnehna ka chang ve ta, inrintawkna min pek belh bakah hnehna hlu tak chu a ni," tiin a sawi.

Inkhel dangah Gauff hian Anastasia Potapova chu a lo hneh. Amercian player hian court chhungah minute 22 chiah hun a hmang, set hmasa berah 5-0 a hma a hruai laiin a khingpui hi hliam vangin a inkhel chhunzawm thei lo.

Hliam vanga hun rei tak a chawlh hnuah Halep a lo kir a, mahse result ṭha erawh a nei lo. Vawi hnih a champion tawhna hmunah Halep hi Danielle Collins nen an intawng a, set hmasa ber la mah se a hnuhnung pahnih a hloh avangin 6-2, 4-6, 4-6 in a tlawm.

Romanian nula Halep chuan, "Hun rei tak hnuah ka inkhel ve leh chauh, hnehna chang lo mah ila ṭha taka ka khelh theih avangin ka lawm," a ti a, Grand Slam hnuhnung US Open khelh theih a in beisei.

Rome Open khelh laiin Halep hi a hliam, a chawl hliam vangin French Open aṭangin a inhnukdawk a, nomawi a kawl mekna Wimbledon mai bakah Tokyo 2020 pawh a khel thei lo, tunah chuan harsatna nei loin a inkhel thei ve leh tawh.

Champion tura rinkai Aryna Sabalenka erawh a chak hram. Seeded pakhatna Sloane Stephens nen an intawng a, set khat ve ve an lak hnuah deciding set an khel. Set hnuhnung berah 4-1 in hniam hman mah se 7-6, 4-6, 6-4 a tho chhuakin a chak hram.