Doncic-a'n contract thar a ziak

Luka Doncic chuan Dallas Mavericks tan contract thar a ziak, an inremna hi a rei zawng chiang taka tarlan ni lo mah se, a hlutna hi pound maktaduai 194.6 zet a nih avangin an club-in contract an ziahpui tawh zinga sum tamna ber a ni.

Slovenian tlangval hi kum 22 mi chauh a la ni a, basketball inelna sang NBA huangah player langsar leh beisei awm berte zinga mi a ni mek - Tokyo 2020 pawh khelin sulhnu duhawm a hnutchhiah bawk.

Olympic-ah khan Argentina an hneh ṭumin Doncic hian point 48 zet a nei, Olympic huanga chuan match khata point nei hnem pahnihna dinhmun a nih rual hial - champion pui lo mah se semifinal an thleng kha chanchin ṭha a tling.

Mavericks neitu Mark Cuban chuan, "Luka hi ka chhuang hle, kan hnen a rawn pan tirh khan beiseina sang tak kan nei a, a chungah mawhphurhna sang tak a awm bawk, mahse chung zawng zawng chuan a tibuai lo.

"A chunga mawh-phurhna a san zawh poh leh a khel ṭha zual ṭhin ni maiin ka hria. Hmabak eng tak nei, club dang pawhin an hnena khel tura an duh tak mai a nih avangin kan hnena a cham chhunzawm zel tur hi a lawmawm," tiin a sawi.

6ft 7in a sang point guard hi NBA All-Star atan vawi hnih thlan a ni tawh a, All-NBA First Team atan vawi hnih bawk an thlang tawh - hliam nei loa a khel tluang thei a nih chuan season tharah player hmuhnawm tur zinga mi a ni.