Zaninah La Liga an ṭan dawn

Cristiano Ronaldo hun a liam a, Lionel Messi leh Sergio Ramos te pawhin an puanthuah an tel san ta. Spanish La Liga boruak a zuai ruih a, league erawh a kal pangngaiin a kal chhunzawm ang.

Zanin dar 12:30 hian La Liga 2021-22 season chu khelh ṭan a ni dawn. Valencia khelmual Mestalla Stadium-ah Getafe an lenglut ang, inkhel hmuhnawm a nih nghal a rinawm.

Team pahnih hian season hmasa khan beisei an phak lo. Jose Bordalas enkawl Valencia hian 13-na ni chungin kum tawp an hmang, European football khel ṭhin club tan season duhawm lo tak a ni - kuminah chuan a bul aṭanga ṭan fuh an tum ang.

Getafe pawh 15-na an ni, zanina an hmachhawn tur Valencia an phak lohna chu point nga a ni, inhamtan tuma season tawp lama thapui thawh chiam ai chuan a bul ṭan ṭhat an tum ve tho dawn, khualmualah point khat lek an hmu a nih pawhin a lawmawm dawn.

Tun hma lama an intawn tawhnaah Valencia hian match 20 aṭangin vawi riat hnehna an chang a, vawi khatin an chak tam. An intawn hnuhnung berah Getafe hian 3-0 in hnehna an chang, zaninah an chak a nih chuan club pahnih chak zat a intluk ang.

Spanish football inelna sang berah hian Real Madrid chuan Carlo Ancelotti kaihhruaina hnuaiah boruak thar an hip dawn. Messi awm lohna Barcelona kan hmu dawn bawk, champion lai Atletico Madrid-in nomawi an humhim thei ang em tih chu zawhna lian tak a ni.