Korea leh Macau Open an khel dawn lo

Hripui leng vanga buaina chu a la reh thei lo. Coronavirus vangin Korea Open leh Macau Open te chu khelh theih a nih dawn loh thu Badminton World Federation chuan an puang chiang.

Ruahman dan chuan Korea Open hi tun thla tawp aṭanga khelh ṭan tur niin, Macau Open hi November thla a khelh tur a ni thung. Inelna pahnih an ṭhulh bakah hian BWF chuan China-a neih tur World Junior badminton championship pawh a hun an sawn.

BWF chuan thu chhuah siamin, "Ram hrang hrangin hrileng vangin inkaihhruaina dan an nei hrang vek a, chuvangin tunah chuan duhthlan tur dang kan nei tawh lo. BWF chuan a theih chin chinah season calendar a siamsa chu zawm kan tum, amaherawhchu a theih loh chin a awm," an ti.

Inelna neih hun an sawn hlat tawh zinga mi Malaysia Masters leh Malaysia Open te pawh engtik huna khelh tur nge tih a la hriat loh.