Nagelsmann hnuaiah Bayern fiahin awm dawn

Bundesliga chu zanin aṭangin khelh ṭan a ni dawn a, champion lai Bayern Munich chuan zanin dar 12:00 hian Borussia-Park-ah Borussia Monchengladbach an hmachhawn dawn.

Bayern inkhel en a châkawmna chhan chu Julian Nagelsmann a ni a, Bavarians hi kum 34 mi manager hnuaiah an khel ṭan dawn. Hansi Flick chhuah rualin Javi Martínez, Jerome Boateng leh David Alaba te an chhuak tel a, Bayern thar kan hmu dawn.

Bayern thar chu
Bayern Munich hian season thar atana inpuahchah nan Gladbach hi an hmachhawn tawh a, 2-0 in an hneh lo. Bavarians hi friendly match-ah Ajax nen an inhnehtawk a, Napoli 3-0 ngawta an hneh loh bawk Nagelsmann naute hi rin thiam an har hle.

Bavarians harsatna belhchhah turin Benjamin Pavard chu inhliam vangin season ṭantirh lamah a inlan thei dawn lo a, tlarhnung player Lucas Hernandez, Alphonso Davies leh Omar Richards ten hliam vang thoin Glabach an hmachhawn a rinawm lo bawk.

Alaba leh Boateng te an chhuah avangin defender thar Dayot Upamecano chu rinrawl ni turah ngaih a ni a, Bayern tlarhnung an ngaihtuahawm hle.

Chutihrualin tlarhmaah Robert Lewandowksi an nei a; Kingsley Coman, Leroy Sane, Jamal Musiala, Serge Gnabry leh Leon Goretzka te awmna an nih avangin Bundesliga nomawi humhim ngei tura ngaih an ni.

Gladbach hi...
Borussa Monchenglabach pawh hi manager thar Adi Hutter hnuaia khel tur an ni a, friendly match hnuhnung pathuma an chak avangin Bayern hmachhawn turin a inpeih tihin a sawi theih.

Gladbach tan Lars Stindl a ṭangkai leh dawn a, Florian Neuhaus, Marcus Thuram, Jonas Hofmann, Christoph Kramer, Matthias Ginter, Denis Zakaria leh Ramy Bensebaini te an neih avangin season tharah Europe inelna khelh phak an tum dawn.

Amaherawhchu Glabach hian season liam ta khan inrintawkna an hloh a, season chawhnu lama an chet ṭhat tawk loh avangin pariatna an ni. Euro 2020-ah an player-te an che ṭha a, hemi avang hian inrintawkna neih let ngei an inbeisei ang.

Thlirna tawi
Bundesliga aṭangin Bayern Munich, RB Leipzig, Borussia Dortmund leh VfL Wolfsburg ten Champions League an khel ang a, Eintracht Frankfurt leh Bayer Leverkusen ten Europa League an khel dawn.

Inelna thar Europa Conference League chu Union Berlin-in an khel ang. Season liam ta khan Werder Bremen leh Schalke 04 te chu an relegate a, 2. Bundesliga aṭanga kai thar chu VfL Bochum leh Greuther Furth te an ni.

VfL Bochum hi kum 1848 daiha din tawh a ni a, kum 173 upa niin season liam ta khan 2. Budesliga-ah point 67 hmuin a champion. Greuther Furth pawh hi September 23, 1903-a din tawh kha a ni a, season liam ta khan point 64 hmuin pahnihnaah an awm.

Relegation playoff hmangin club pathumna tur hi zawn ṭhin a ni a, playoff-ah hian season liam taa 16-na FC Colgone-in 2. Bundesliga-a pathumna Holstein Kiel chu 5-2 in an aggregate hmangin an hneh.