Hei le Premier League Transfer ngaihnawm & Coach thar!

European football-a league ngaihven hlawh ber Premier League en turin nghah rei a ngai ta lo - zanin dar 12:30-ah Brentford leh Arsenal ten match hmasa ber an khel dawn a, football ngainatute tan kar tawp hlutna a zual leh dawn.

Brentford-in a vawi khat nan Premier League an khel dawn a, anni bakah hian Watford leh Norwich City chu tun season-a kai thar club an ni - club pahnih erawh tawnhriat an nei ṭha a, 2019-20 season-a an relegate hnua English top flight-a rawn kir lehnghal an ni.

Crystal Palace, Wolves, Everton leh Tottenham Hotspur ten coach thar nei chungin season an hmachhawn dawn a, transfer ngaihnawm tak tak thleng a awm nual bawk.

Manchester United boss Ole Gunnar Solskjaer chuan, "Premier League season hautak ber pawl a ni dawn," tiin a thlir lawk a, a ngaihdan ṭawmpui lo an tlem ngawt ang.

Transfer ngaihnawm
Covid-19 vangin club tin sum lakluh tlahniam mah se club tam zawkin talbuai phah nan an hmang duh lo a, transfer lian tham a thleng nual - heng zinga lian ber erawh Jack Grealish-a'n Manchester City a zawm chu a ni a, British transfer record fee ni turin City hian Aston Villa aṭangin pound maktaduai 100-in an lalut.

Manchester United-in fan-te an duh zawng pein Jadon Sancho an lalut fel ta a, Real Madrid defender Raphael Varane an sawm lut bawk - world class player pahnih lalut tur hian pound maktaduai 107 an seng a, Ole tan chhuanlam tur a tlem sawt.

Arsenal-in Brighton & Hove Albion defender Ben White chu pound maktaduai 50-in an lalut a, Liverpool-in Ibrahima Konate chu RB Leipzig aṭangin pound maktaduai 35-in an seng lut bawk.

Tottenham Hotspur an awm mai mai bik lo - Argentina defender Cristian Romero chu Atalanta aṭangin pound maktaduai 42-in an lei a, Aston Villa-in pound maktaduai 83 senga striker Danny Ings (Southampton), Argentine midfielder Emiliano Buendia (Norwich) leh winger Leon Bailey (Bayer Leverkusen) an lakluh chu thawm ring zingah a tel.

Beiseina
August 31-ah transfer bazar khar a ni dawn chauh a, season ṭan hnuah pawh Premier League club-ten player an lei thei dawn - City-in Harry Kane lakluh an la tum reng a, Spurs striker hi an thlem chhuah ngei a rinawm.

Chelsea leh Romelu Lukaku chu inrem tawh ang hiala ngaih a ni a, Inter Milan striker hi he thu ziak i chhiar meuh chuan Chelsea player a ni tawh hial mai thei.

Pound maktaduai 17-a Lille midfielder Boubakary Soumare leitu Leicester City-in hliam vanga Wesley Fofana an chân hnuin centre back dang an melh a, Southampton defender Jannik Vestergaard an lalut ngei dawnin a lang - a man hi pound maktaduai 15 bawr vel a ni ang.

Hetihlai hian player langsar zingah Premier League chhuahsan an awm ve nual a, Manchester City legend Sergio Aguero (Barcelona), Chelsea striker Olivier Giroud (AC Milan) leh Liverpool midfielder Georginio Wijnaldum (Paris St-Germain) te chu chhuak langsar zual an ni.

Coach thar
Tottenham-in Jose Mourinho thlaktu tur rei tak an zawn hnuah Nuno Espirito Santo an lalut a, Spurs fan-ten he coach hi a tirah duh lo mah se Wolves tana a hnathawh tawh thlirin a iaiawm loh - top seven-ah Wolves chu vawi hnih season a kharpui a, FA Cup semifinal leh Europa League quarterfinal a luhpui bawk.

Liverpool boss hlui Rafael Benitez-a'n Everton a enkawl tur hi ngaihven hlawh zual a ni a, "Club tenau" tia Everton chungchang lo sawi tawhtu coach hian lawm a hlawh rih lo hle - a tawnhriat leh theihna enin Everton a enkawl duh hi Toffees fan-te erawh lawm tur an ni.

Benfica boss hlui Bruno Lage chuan Spurs coach thar ni ta Nuno hmun ruak luahin Wolves a enkawl dawn a, kum 45 mi coach hian 2018-19 khan Primeira Liga-ah Benfica a champion pui avangin beiseina a sang ang.

Arsenal captain ropui ṭhin Patrick Vieira chu Crystal Palace coach ni turin Premier League-ah a kir a, player a nihna anga hming a lo chher tawhna hmunah hian coach angin a hming a chher thei ang em? Hunin a hril zel dawn e.