Benfica-in hun ṭha bawhpelh

Coronavirus len hnua Portuguese Primeira Liga an match hmasa berah Porto an chak lo a, an elpui Benfica chuan tlansan theihna hun ṭha nei mah se Ningani zan khan Tondela nen goal awm loin an inhnehtawk ve leh.

Nilaini zanah Porto chu Famalicao lakah 2-1 in an tlawm. Benfica lamin an elpui chak loh hre chungin match nei mah se point thum an hmu zo lo, team ṭha pahnih hian point 60 ve ve neiin an inel tawk rih hle.

Hri leng vangin inkhel hi a hmuna entu awm phal a ni lo. Benfica stadium pawnah erawh fans ṭhahnem tak an pungkhawm tho a, player chuanna bus haw lam chu beih niin lungin an vawm.

Bus darthlalang vawm keh a ni a, midfielder Julian Weigl leh winger Andrija Zivkovic te chuan hliam an tuar. Player pahnih hi Lisbon damdawi inah hruai nghal an ni a, ngaihtuah awm erawh an ni lo.