Premier League: Thil thar enge kan beisei dawn?

English top flight league khelh hun a thleng a, a lawmawm bera chhal ngam chu stadium-a fan-te an kir leh thei tur hi a ni - inkhel a hmuhnawm sawt ang.

Covid-19 vangin thla 17 vel zet chu stadium khatin fan-te an pungkhawm thei tawh lo a, tun season-ah erawh stadium khatin fans an awm leh thei dawn ta - inkhel boruak a nung dawn.

Stadium-a fan-te kirna tur piahlamah hian dan thar siam a awm nual bawk a, VAR leh handball chungchanga dan thar siam pawh hi Premier League fans tan chuan hriatchian a ṭul hle.

Fans an kir dawn
Covid-19 vangin March 2020 hnuah stadium khata fans punkhawm England-ah a awm leh tawh lo a, mahse, July 19 khan UK sorkar chuan inkhuahkhirhna tam tak a hlip a, stadium khata fans punkhawm phal a ni leh tawh dawn.

Hetihrual hian khelmual leh fans ṭhutna inhnaih lutuk stadium-ah te chuan a khata fans punkhawm phal a la ni dawn lo. UK sorkar chuan fans tan vaccine la tawh an nih leh nih loh tih lanna ken tur chungchangah thutlukna a la siam lo a, khawthlang media ṭhenkhat chuan mi 20,000 aia tam punkhawmnaah chuan hei hi kalpui a ni dawn niin an sawi.

Stadium hi red zone, amber zone leh green zone-ah ṭhen hran a ni. Red zone huangah khelmual, technical area, tunnel leh dressing room te dah a ni a, he zone-a lut tur chuan a hma ni nga aia rei loah negative result an nei tur a ni a, hei hi 'clinical passport' tih an kenah a chuan a ṭul dawn - he zone-a awm thei chin chu mi 110 a ni.

Amber zone hi stadium-a fan-te ṭhutna, luhna leh khelmual sir interview-na hmunte a ni a, luh leh chhuahah dan khirh tak siam niin fan-te chu stadium luh hmain temperature en zel tur a ni. Green Zone erawh stadium pawn lam a ni thung.

VAR dan thar
Kum 2019 khan Premier League-ah video assistant referee hman ṭan a ni a, hei hi inkhel result thlak danglam thei goal, penalty, red card leh ani lo zawk hrem palh thila tihsual siamṭhat nana tih a ni.

Tun season-ah pawh VAR hi hman chhunzawm a ni dawn a, mahse, offside-a sawiselna tam ṭhin tih bo nan 'line' tê zawk hman a ni tawh dawn a, hei hian ke zungpui leh zakhnuai te avanga offside awm leh ṭhin chu a tihbo beisei a ni.

Match official-te chu thil thleng tenau lutukah penalty pe lo tura hriattir an ni a, Euro 2020 semifinal-a Raheem Sterling-a'n Denmark laka a penalty hlawh-chhuah ang chi kha penalty-ah inpe lo turin an hrilh!

Sterling-a penalty kha tun thlengin sawisel a la ni a, khatiang 'nem' lutuka penalty pe lo turin match official-te hi an inhriattir a ni.

Handball chungchang
Football khawvela dan duangtu International Football Association Board (IFAB) lamin an lo rel tawh angin ball-in kut a tawh fuh zawng zawng chu handball-ah chhiar a ni vek dawn lo.

Handball ham a nih dawnin taksa pum chet dan leh kut chet dan chu enkawp tur a ni a, a lan tur ang aia taksa a lang len chuan handball pek tur a ni.

Goal khungna kawnga tihpalh thil thua kuta ball tawh fuh palh chu handball a ni tawh dawn lo a, chutihrual chuan kut hmanga goal khung emaw, 'accidental handball' kaltlanga rang taka goal khung a nih chuan pawm a ni chuang lo ang.

Season hmasa khan lua hliam tuar player an awmin, substitution siam zawh vek tawh pawh ni se, substitution pahnih siam theihna dan siam a ni. Premier League chuan hei hi tun season-ah a hmang chhunzawm dawn a, player zingah lua hliam tuar an awm chuan, substitution hman zawh pawh ni se, lakchhuahin, an aiawh tur luhtir a ni thei dawn tihna a ni.

Ṭhingṭhit zel tur
Season hmasa khan league match khelh ṭan a nih dawn apiangin player-te an ṭhingṭhi ṭhin a, hei hi chi leh chi inthliarna tibo tura hmalakna chi khat a ni.

Tun season-ah pawh he tihdan hi chhunzawm tur a nih thu Premier League player-ten an sawichiang tawh a, English top flight thuneitute chuan player-te thutlukna hi an thlawp thu an sawi tawh.

Player-te chuan thuchhuah inṭawm siamin, "Chi inthliarna dona kawnga kan inthurual zia pholan nan inkhelh hmaa ṭhingṭhit zel hi tun hma zawng aiin a ṭul lehzualah kan ngai a ni," an ti.

Hei mai hi a ni lo - player-te kawr banah, 'No Room for Racism' (Chi inthliarna atan hmun a awm lo) tih a inchhu kai zel bawk ang.