Australian player-te an khung hrang rei hret!

Tokyo Olympic-a feh chhuak Australian player ṭhenkhat chu ni 28 zet Australia an kir hnuah inkhunghrang tura tih an ni a, hei hi Australian Olympic Committee (AOC) chuan a hrethiam lo hle.

Australia hian ram pawn aṭanga hawte chu kar hnih chhung inkhunghrang tura tihna dan an nei sa a, hemi piah lamah hian South Australia state aṭanga Olympic-a kal, Sydney paltlang player-te chu an state sorkar chuan an rama an haw hunah kar hnih dang inkhunghrang leh turin an ti!

AOC chuan, "Ram dangin an infiammite hlim leh lawm taka an lo lawm haw laiin keini erawh rawng leh ngaihsak lo takin an chungah kan che a ni," an ti a, "Ram tan ṭha taka an fehchhuah lawmmanah hremna kan pe a ni," an ti zui.

South Australia sorkar chuan, "Sydney khawpui awmna New South Wales-a Covid-19 Delta Variant dinhmun avangin hetianga thutlukna siam hi a ṭul a ni," an ti a, Sydney-ah inkhunghrang mah se an state infiammite lo lawmluh nghal ngawt chu an tan a him loh thu an sawi.

AOC chief executive Matt Carroll chuan, "Kan Olympian-te hian vaccine an la ṭha a ni mai lo a, Tokyo-ah pawh uluk taka engkim kalpuina hmunah an awm a, ni tin test neiin an fimkhur em em a ni," a ti a, infiammite khung hrang nawn lo tura South Australia sorkar an ngennain awmzia a nei lo chu mak a tih thu a sawi bawk.

Australian Institute of Sports chief medical officer David Hughes chuan, "Ni 28 zet inkhunghran hian taksa mai ni loin rilru lam thlengin nghawng a nei ang tih a hlauhawm hle," a ti.

Australia-ah hian Covid-19 kai mi 35,000 chuang awrh chiah an la awm a, he hri leng avanga thi pawh he thu buatsaih a nih lai hian mi 927 bak an la ni lo.