Kar li vel chawl tur Foden

England midfielder Phil Foden chu hliam vangin kar li vel a chawlh a ngai dawn a, Euro 2020 a inhliam midfielder hian Manchester City tan season bul a ṭan ve thei dawn lo tihna a ni.

City hian August 15, zan dar 9:00-ah Tottenham Hotspur lenchilhin league season an ṭan dawn a, Norwich City leh Arsenal an hmachhawn zui bawk ang - tuna a lan dan chuan Foden hi match thumah hian a inlan thei dawn lo.

Kum 21 mi Foden chuan, "Ka tan chuan a harsa takzet a, a rang thei ang bera khelmuala kir leh ka duh a ni. Euro final khelh hmaa inhliam kha chu hrehawm duh tak a ni.

"Training ka neih laiin a rawn thleng ringawt a, a vanduaithlak takzet a ni," tiin a hliam chungchang a sawi a, kar li hnua lo kir theih a beisei.

Foden hi a beisei huna a lo kir thei a nih chuan September 11-a Leicester City an lenchilh hunah a inlan ṭan ve thei dawn tihna a ni a, September thlatira England-in Hungary nena World Cup qualifier an khelh turah erawh a lo kir a rinawm chiah lo.