Corona, kan zuam lul lo che!

Tun lai khawvel titi luahtu hrileng coronavirus-in thliar bik a nei lo a, infiamna khawvel ngainatute tan pawh ennawm en tur a tlem ta hle.

Mizote ngaihven rawn Premier League meuh pawh a nghawng ta hial a, kalphung pangngaiin khawvel a kal thei lo a, a khawharthlak zawnga ngaihtuah phei chuan khawharthlak tak a ni.

European football-a league sang ber ber te pawh an chawl ṭhuap a, UEFA hnuaia inelna te pawh kan thlir leh theih hun tur kan hre ta rih lo. Heng zinga Mizo te lunglentu ber chu Premier League niin a lang.  Arsenal manager Mikel Arteta leh Chelsea winger Callum Hudson-Odoi chu coronavirus kai zingah an tel a, he hrileng hian eng ang takin nge Premier League club-te a nghawng tih chu zawhna a ni.

Arteta chu Premier League manager zinga he natna kai hmasa ber a ni a, Gunners hian thuchhuah siam nghalin Arteta hnaiha awm club chhungkuaa mi te chu an khung hran thu an sawi - hei hian coaching staff, first team squad, training centre leh academy-a mi ṭhenkhat a huam. 

Chelsea nena an league match khelh tur chu ṭhulh a nih tak avangin hnathawktute tana ei tur an lo 'order' tawh sa chu cancel mai loin chenna in nei lo leh mi harsa zawkte tan an sem.

Covid-19 rinhlelh thuah goalkeeper Artur Boruc leh first team staff palite chu khung hran an ni a, an kai ngei a ni tih chianna erawh a la awm loh thu club chuan an sawi a, sorkar kalphung an zawm vang chauh a nih thu an sawi. 

Brighton club member zingah he thu buatsaih thleng hian nghawng a la nei lo niin a lang a, March 14-a Arsenal nena an inkhel tur sawn a nih khan club chief executive Paul Barber chuan fan-te hnenah ngaihdam a dil.

Clarets boss Sean Dyche chuan, "Eng thutlukna pawh awm se pawmthiam turin kan inbuatsaih ang. Hriselna aia pawimawh zawk thil a awm lo," a ti a, league thutlukna apiang pawm turin 

an inpeih. 

Kar hmasa Ningani khan England international Callum Hudson-Odoi chuan he hri hi a kai tih hmuhchhuah a ni a, March 9 khan a taksaah a lan ṭan avangin khung hran a lo ni tawh. Chelsea chuan an player hi inenkawl dam tura a la inkhunghran rih tur thu an sawi a, ani chauh lo club-a hnathawk, mipa team, coaching leh backroom staff te chu khung hran vek an ni. 

Hudson Odoi hian social media lamah a dam tawh thu a tarlang a, "In hriat angin coronavirus ka kai a, mahse tunah chuan ka dam tawh. Tih tura min tuk ang chu ka ti a, kar khat chu ka inkhunghrang tawh. Kan inhmuh a, khelmuala ka let leh thuai ka beisei," a ti. 

Palace boss Roy Hodgson chuan coronavirus vanga a chi ai loh thu a sawi a, kum 72 mi lai ni tawh mah se thlaphanna a nei lo. "Kan club inenkawlna a ṭha a, engkim thianghlim leh fel takin kan ti a ni," a ti. 

Everton player, a hming tarlan loh chu ni sarih chhung khung hran a nih tawh thu Zirtawpni khan club-in an puang a, coronavirus a kai ngei tih finfiahna erawh a la awm lo - club training-na pawh khar rih a ni.

Foxes player pathum dam loh dan chu covid-19 lanchhuah dan nen a inanga hriat a nih avangin ni sarih chhung khung hran an ni a, he thu hi club chuan Ningani khan puangin an player-te chu ngaihtuahawm an nih loh thu leh mahnia inenkawl theih a nih thu an sawi. 

Reds manager Jurgen Klopp chuan Premier League chawlh lailawk an thlawp thu a sawi a, "Mipui himna tura tih a nih avangin kan thlawp a ni," tiin fan-te hnena lehkha a thawnah a ziak. Premier League hmahruaitu club hian Anfield-a Liverpool legend leh Barcelona legend, March 28-a charity match khel tura tih pawh chu an sawn a ni. 

City defender Benjamin Mendy chu an chhungkaw zinga mi coronavirus vanga damdawi ina dah luh a nih hnuah in lamah inkhunghrangin enkawl a ni a, he thu buatsaih thleng hian result a la awm lo. 

Red Devils player zingah rinhlelh an la awm rih lo. United hian Europa League-ah Austrian club LASK Linz chu entu awm loin an hmachhawn a, 5-0 in an chak. Ticket leitu United fans 900-te chu an ticket leina man pek let an ni. 

February 28 aṭang khan Magpies player-te chuan zing tina an in chibai ṭhin chu an ti tawp tawh a, manager Steve Bruce chuan engkim a chian vek hnuah Premier League chu khelh leh chauh ni mah se pawi a tih loh thu a sawi. 

Player zingah coronavirus kai an la awm lo a, club chuan thuchhuah siamin an staff, player leh fan-te himna chu an ngaih pawimawh ber a nih thu an sawi. 

Sheffield boss Chris Wilder chuan, "Mipui himna hi ngaih pawimawh ber tur a ni," a ti a, entu awm loa inkhel chuan hlutna a neih loh thu a sawi bawk. 

Saints manager Ralph Hasenhuttl chuan, "Thil dangin ṭangkaina a nei rih lo," tiin coronavirus do tura inthurual a pawimawh thu a sawi.  Southampton forward hlui Manolo Gabbiadini chu coronavirus kai zingah a tel a, kum 28 mi striker hi Italian club Sampdoria tan a khel mek. 

South Korea aṭanga England a kir leh hlimin February thla tawp lam khan forward Son Heung-min chu kar hnih chhung a inkhung hrang. Spurs-in thuchhuah an la nei rih lo a, an him niin a lang. 

Watford player pakhat chu coronavirus a kai tih hmuhchhuah a ni a, player dang hriselna chu rinhlelh thilah enfiah a nih thu coach Nigel Pearson chuan a sawi bawk - player-te hming hi puanzar a ni lo. 

March 7 khan West Ham hi Arsenal nen an inkhel a, a hnu rei lo teah Gunners boss Mikel Arteta chuan coronavirus a neih thu tihchian a ni. He thil avang hian Hammers chuan an hnuaia thawk, Arteta nena inhnimhnaite chu an khung hrang zui a ni. 

Europa League last 16 first leg khel tura Olympiakos an lenchilh dawn khan Wolves hian Greek club neitu Evangelos Marinakis chuan coronavirus hi a kai avangin an inkhelh hun sawn an dil a, UEFA chuan rem a tihsak loh avangin entu awm lo chungin an khel. Team pahnih hi 1-1 in an inhnehtawk zui.