Spurs-in loan an puk hnem

Tottenham chuan Bank of England aṭangin pound maktaduai 175 loan an puk a, pawisa hi coronavirus vanga sum lama harsatna an tawh theih hrang hrang sut kianna tur a ni ang.

Spurs hian mi 62,303 lenna stadium an sa thar hlim a ni a, hun rei tak pawh an la luah hman lo. Premier League an khel chhunzawm a nih pawhin a hmuna entu an awm thei dawn lo, hripui leng vang hian pound maktaduai 200 vel hloh turah an inngai.

Loan hi Covid Corporate Financing Facility hnuaih an puk a, a punna chu 0.5% chauh a ni ang. Club chairman Daniel Levy chuan, "He club hi mahni intungnung thei turin theihtawp kan chhuah," a ti.

Tun hnai season li chhung chu Tottenham hian Champions League an khel phak ziah, season hmasa phei kha chuan final thleng hial mah se Liverpool an ngam lo thung; stadium sak vanga sum an inhrekna chu zalen dawn ṭan chauh mah se hri leng vangin harsatna dang an tawk leh.

Tottenham khelmualah hian inkhel en man aṭanga sum hmuh bakah, Guns N' Roses, Lady Gaga leh Capital Summertime Ball concert-te neih tura tih a ni a, boxer ropui Anthony Joshua leh Kubrat Pulev te chu inhnek tura tih an ni bawk - tun dinhmunah chuan mipui punkhawmna hi tih theih a la ni rih lo.

Kum 2001 aṭanga Spurs chairman ni tawh Levy chuan, "Hun rei tak chhung chu he club hi ka lo kaihruai ve tawh, kum 20 hun ka hman chhung hian tun ang em em a harsatna lian kan tawh hi ka la hre ngai lo. Covid-19 zet chuan mitin mai hi na takin min nghawng," a ti.