Kane hmaa awm Man City
Premier League champion Manchester City-in Pathianni zan dar 9:30 hian Tottenham Hotspur an tlawh dawn a, Harry Kane vangin inkhel tur boruak hi a san phah hle.
England captain Kane hian Spurs chhuahsan a duh a, Man City-in pound maktaduai 100-a lei an dil chungin London club hian an chhuah phal lo. Man City hi Kane lak tumin an la beidawng lo a, chutihrualin Pathianni zanah erawh English striker hi Pep Guardiola hote lama goal khung thei dinhmunah a ding thung.
City leh Kane
Manchester City-in pound maktaduai 100 senga Jack Grealish an lalut tawh chungin Kane an la ngaihven reng. Pep Guardiola chuan, "Spurs-in anmahni dawrtu an ngaihthlak duh loh chuan tih ngaihna a awm lo," ti hialin sawi mah se an la beidawng lo.
Kane pawh hian nomawi vanga Tottenham chhuahsan a rilruk thu hi League Cup final-a Man City an hneh loh zawh aṭangin a sawi ri ṭan tawh. Chutihrualin Kane hian kum 2024 thleng London club tana contract a neih avangin chhuak tur chuan Spurs phalna a ngai.
Spurs chairman Daniel Levy hi transfer-ah chuan a tawhkhirh ber zinga mi a ni a, Man City dilna hmasa pound maktaduai 100 a hnawl hi a mak lo. Amaherawhchu Man City-in euro pound maktaduai 150 an theh chhuak phal niin transfer lama journalist rintlak Fabrizio Romano chuan a tarlang a, a chet ṭhat dan a zirin Kane a man hi pung thei turin a ziak tel.
Kane hian chhuah a duh ngei tih lantir nan training a zawm lawk lo a, English striker hian chhuah a duh vanga club a nawrna a nih loh thu sawi mah se Man City pan a duhzia hi tlang hriat a ni tawh. Premier League legend Alan Shearer meuh pawhin, "Kane hi September thla hian Spurs-a a la cham a nih chuan mak ka ti khawp ang," tiin a sawi hial a ni.
Spurs striker Kane hian training a zawm tlai avangin Pathianni zanah a inlan ang em tih a hriat loh a, chutihrualin English striker hian Man City laka goal a khung thei a nih chuan a chunga Spurs ṭantute ṭhahnem tak chuan a elpui club a zawm tur hi an ngaihdam theih phah ngei ang.
En châkawm Grealish
Kane lut ta lo pawh ni se Man City leh Spurs inkhel tur erawh en a châkawm tho tho. Community Shield-ah Premier League champion hian Leicester City an hneh lo a, player thar Jack Grealish chu bench aṭangin a inlan.
Spurs lakah erawh Grealish hi bul ṭan tura ngaih a ni a, Man City jersey number 10 nena league match hmasa ber hi chhinchhiah tlaka siam a duh ang. Chutihrualin Guardiola-a'n Grealish a chhawr dan tur hriatthiam a la har a, forward pangngai nei lo Man City-in 'false nine' a an chhawr a nih pawhin a mak lo ang.
Community Shield-ah Man City an kim lo a, Spurs nen hian Kevin de Bruyne leh Phil Foden te hliam vangin an la awm dawn chuang lo. Chutihrualin academy player Samuel Edozie leh Cole Palmer ten bul an ṭan a rinawm tawh lo a, goalkeeper-ah pawh Ederson a rawn kir a rinawm bawk.
Spurs an zia
Tottenham Hotspur-in Nuno Espirito Santo hnuaiah bul an ṭan dawn a, Jose Mourinho hunlai angin thawm nei ring lo mah se an chhe ta thut tihna a ni lo. An thiampuipa Kane a chhuak dawn a nih chuan channa nasa tak a ni thei ang a, amaherawhchu English striker tel lo pawh hian Spurs hi an tawh a la khirh khawp ang.
Mourinho chhawr duh loh Dele Alli-a'n Nuno hnuaiah career a ṭan ṭha leh dawn Euro 2020-a khel ṭha Pierre-Emile Hojbjerg bakah Lucas Moura leh Steven Bergwijn te an la awm. Son Heung-min-a'n contract a pawtsei a, South Korean star hi Kane awm ta lo pawh ni se innghahna tlakah a ngaih theih.
Hriat tel tur chu Spurs hian friendly match-ah an hmelma Arsenal 1-0 in an hneh a, Chelsea nen 2-2 in an inhnehtawk. Friendly match hi chu tehfung atana en tur a ni lo chungin Nuno hote an chhelo tih erawh a hriat theih thung.