Vawiin tlai dar 5:00-ah Manchester United Vs Leeds United

Kum 2000 chhoa Premier League en ṭhin chuan Manchester United leh Leeds United inhalzia an hrethiam ang. Vawiin tlai dar 5:00 hian club inhal pahnih hi Old Trafford-ah an inhmachhawn dawn a, a hmuhnawm dawn.

Leeds manager Marcelo Bielsa chuan kum khat atan a contract a pawtsei a, keeper Illan Meslier-a'n kum nga atan contract a pawtsei bawk. Leeds hian Argentine manager an chelh theih avangin tun season Premier League-ah pawh team hmuhnawm ber zinga mi an ni leh ang.

United an phur
Manchester United-in transfer a hmang ṭha a, hming langsar pahnih Jadon Sancho leh Raphael Varane an lalut a, an sum hman dan thlirin nomawi an duh tih a chiang. Amaherawhchu Man United hian Ole Gunnar Solskjaer hnuaiah nomawi an la chawi lo, football pundit langsar hoin squad ṭha tak an din tawh chungin Manchester City leh Chelsea tluk pha turah an ngai lo.

Man United tan anmahni ringhlelhtu hmui hup dan ṭha ber chu nomawi a ni a, chumi ti tur chuan Leeds United aṭangin an theihna an lantir ṭan a ṭul dawn. Varane-a'n contract a tih fel har avangin defence laiah Harry Maguire leh Victor Lindelof an inkawp phawt a rinawm. Euro 2020 hmang ṭha Luke Shaw-a'n en bik a hlawh thei a, Covid-19 vanga Dean Henderson a inkhung hran avangin David de Gea-a'n first keeper chanlet theihna hun ṭha a nei bawk.

Tlarhma lamah Sancho-a'n bul a ṭan nghal a rinawm a, inhliam vangin Marcus Rashford awm lo mah se Bruno Fernandes, Mason Greenwood leh Edinson Cavani te nena goal an nawr tur chu a hmuhnawm tham ang. PSG-in Lionel Messi an lak tak avangin Paul Pogba pawh Old Trafford-ah a cham dawn a, French midfielder a theihna ang taka chhawr hi Solskjaer-a hna tur a ni.

Goal a pawimawh
Leeds United-in hun rei tak Premier League an khelh loh hnuin Marcelo Bielsa hoin English football inelna sang ber a khel turin an inpet tling.

Season liam ta khan kum 2011 hnua a vawi khat nan Manchester United nen nikum December 20 khan an inhmachhawn a, Ole Gunnar Solskjaer hote 6-2 in an chak. Old Trafford-ah hian goal li an chhuah hnuah pawh Bielsa-a'n a naute chu goal khung tum turin a la hrilh a, goal khung a ngai pawimawh hle.

Amaherawhchu April 25 khan Elland Road-ah an inkhel leh a, goal eng zat nge lut ang tiha an inriksiak laiin goal khat pawh a lut lo. Vawiin tlaiah pawh hian goal lut tura ngaih ni mah se rin loh angin a thleng ve thei bawk.