£300m man Romelu Lukaku

Chelsea chuan Inter Milan aṭangin pound maktaduai 97.5-in Romelu Lukaku an lalut a, Belgian striker hi Ningani zan khan an tlangzarh. London club-ah hian Lukaku hian kum khatah euro maktaduai 12 a hlawh a, a chet ṭhat dan a zirin a dawn belh thei bawk ang.

Kum 28 mi Lukaku hian Anderlecht aṭanga bul ṭanin Chelsea (£20), West Brom (loan), Everton (£28m), Manchester United (£75) leh Inter Milan (£74)-ah te khel tawhin club hrang hrang leina man belhkhawm hi pound maktaduai 300 vel zet a ni a, a ropui tham hle.

Fapa tlanbo
Kum 10 liam ta khan Lukaku hian Anderlecht aṭangin Chelsea hi a zawm a, pound maktaduai 20 man a ni. Belgian striker hi Didier Drogba thlaktu tu tura beisei ni mah se khelhna hmun a chang pha lo.

Lukaku chuan, "Ka rawn kal hmasak khan naupang mai ka ni a, thil tam tak zir tur ka nei. Tunah erawh tawnhriat tam tak nei leh puitling zawkin ka rawn let. Naupan ka nih laiin Chelsea ka ṭan tawh a, nomawi tam zawk chawi pui tumin ka rawn let a ni," tiin a sawi.

Everton aṭanga Manchester United a pan dawn khan Chelsea nen sawizawm a ni a, Stamford Brige aia Old Trafford a pan chhan kha a agent Mino Raiola vangah a ngaih theih. Euro 2020 hma khan Raiola aiah Federico Pastorello chu Lukaku hian agent-ah a hmang a, Pastorello hi Chelsea director Marina Granovskaia nen an inhriat ṭhat avangin Stamford Bridge-a kir hi a awlsam phah a ni.

Nomawi beisei
Thomas Tuchel-a hnuaiah Chelsea-in Premier League nomawi an beisei a, season ṭan nan Villarreal hnehin UEFA Super Cup nomawi an chawi. Pep Guardiola kaihhruai Manchester City elpha ber tura ngaih Blues hian zanin dar 7:30 hian Crystal Palace an hmachhawn ang.

Premier League match hmasa berah hian Lukaku hi a inlan hman a rinawm lo a, chutihrualin Serie A-a Inter Milan champion puitu hi Chelsea mamawh tak a ni. Chelsea director Marina Granovskaia chuan, "A hun takah a rawn thleng a ni. Kum 28 mi a ni a, Serie A-ah a champion zo chiah. Ani nen hian hlawhtlinna kan chan ngei kan ring," tiin a sawi.