Bundesliga : Haaland leh Dortmund inlan hun
German rama football inelna sang ber Bundesliga chu nizan khan khelh ṭan a ni a, zanin dar 10:00 hian tunlai striker ṭha ber zinga chhal ngam Erling Haaland awmna Borussia Dortmund chuan Eintracht Frankfurt an mikhual ang.
Marco Rose-a'n Dortmund a enkawl hnua a league match hmasa ber a ni dawn. Signal Iduna Park-ah a hmuna entu 25,000 an awm thei tawh dawn a, stadium khatin la lut thei chiah lo mah se entu ṭhahnem tak an awm theih tawh avangin mualneitu nih man a awm dawn.
Hliam an tam
Dortmund hian hliam vangin player ṭha Marcel Schmelzer, Mats Hummels, Marius Wolf, Mateu Morey leh Dan-Axel Zagadou te an la chhawr thei dawn lo a, an hmunruak hnawh khah a awlsam dawn lo - a bik tlakin tlarhnung laia Hummels hmun ruak luah a harsa ang.
Tun thla tir lam khan Julian Brandt leh Thomas Meunier ten Covid-19 an kai tih hmuh chhuah a ni, player pahnih hian natna lang chhuak nei lo mah se inkhel thei dinhmunah an la ding lo a, an tel loa bun an ṭan a ngai dawn bawk.
Dortmund leh Jadon Sancho hming a inrem hman viau, mahse English player hian Manchester United a pan san. German club hian English player Jude Bellingham an la nei a, kum 18 mi midfielder tan kuminah khelhna hmun a zau sawt tura ngaih a ni.
Haaland awmna
Lionel Messi leh Cristiano Ronaldo te boruak a lian a, kum 22 mi Kylian Mbappe pawh player ṭha chungchuang bik a ni. Tun dinhmun bik thlir chuan, kum 21 mi Erling Haaland pawh sawi nep theih a ni lo.
Norway international hian kar hmasa khan DFB-Pokal lamah hattrick siamin season bul a lo khuh hawng tawh. Rose enkawl Dortmund hian Bayern Munich nena Bundesliga title inchuh tak tak an duh a nih chuan an striker hi a pawimawh dawn.
Haaland hian Dortmund tan league match 43 a khelh aṭangin goal 40 a khung a, inelna hrang hrangah chuan match 60 aṭangin goal 60 a khung thei! Goal khung thei chungchuang a nihna hi an chhawr thiam lehzual a nih chuan nomawi chawipui tham khawp sang theihna a nei.
Bul ṭan fuh
Season hmasa khan Eintracht Frankfurt hian a tir lamah beisei an phak lo, season chawhnu lama an insiamṭhat hnuah erawh nasa takin hma an sawn. Pangana ni chungin kum tawp an hmang a, zanin an hmachhawn tur Dortmund nen an inthlauhna chu point li chauh a ni.
Eagles hian an manager Adi Hutter chu Borussia Monchengladbach lakah an chan a, manager thar Oliver Glasner enkawlna hnuaia indin thar tur an ni - Dortmund ang bawkin enkawltu thar an nih avangin an khelh dan tur rin thiam a harsa.
DFB-Pokal-ah third division club SV Waldhof Mannheim chu 2-0 in an ngam lo nghal kha a ni a, team ṭha zawk Dortmund muala point thum hmuh nghal beisei ngam a harsa dawn, an tan point khat chauh hmuh pawh chanchin lawmawm a ni ang.