Olympic silver medallist CJ Ujah an hrem

British tlan chak CJ Ujah chu Olympic-ah khan silver medal hlawh chhuak mah se damdawi hman phal loh a lo hmang tih hmuhchhuah a ni a, suspend lailawk a ni.

Kum 27 mi Ujah hi Team GB men’s 4x100m relay team-ah telin silver an hlawh chhuak a, mahse, Athletics Integrity Unit (AIU) thu chhuak thar bera a lan danin damdawi hman phal loh Ujah hian a lo hmang a, a ṭhiante pawh amah avanga tuar thei dinhmunah an ding mek.

International Association of Athletics Federations hnuaia infiammite endik ṭhintu AIU chuan, "A taksaah damdawi hman phal loh Ostarine leh S-23 hmuh a ni," tiin thuchhuah an siam.

Chutihrual chuan Ujah hi suspend lailawk chauh a la ni a, a insawifiah dan a zirin a hremna hi hlih theih a ni ang - a insawifiahna pawm a nih loh chuan an team hlawhchhuah silver chu pathumna Canada hnenah pek a ni ang a, Ujah hi kum li atan hrem a ni bawk ang.