Celtic tan Europa League a hnai

Scottish club hlun Celtic chuan Europa League third qualifying round aṭangin Jablonec an pet chhuak a, Czech Republic hi Celtic Park-ah 3-0 in an lo hneh.

Celtic hian first leg inkhelah Jablonec hi 4-2 in an lo hneh tawh a, Celtic Park-ah an hneh leh tak avangin Europa League playoff an lut - inkhel pahnih belhkhawma an chakna hi 7-2 a ni a, a namai lo hle.

Coach thar Ange Postecoglou kaihhruaina hnuaiah Celtic hian beisei angin season bul an ṭan lo. Danish club FC Midtjylland chuan Champions League second qualifying round aṭangin an pet chhuak a, an league match hmasa berah Hearts chu 2-1 in an ngam lo bawk.

Mahse, Celtic an insiamṭha a, tunah chuan Europa League khel turin playoff khelh chiah an hmabak ta - Pathianni khan Scottish Premiership-ah Dundee chu 6-0 ngawtin an sawp tawh bawk a, hmalam an pan zel.

Jablonec nena second leg an khelhah pawh hian David Turnbull chuan goal hnih khungin James Forrest chuan goal khat a khung a, goal khung kawngah harsatna an nei lo.

Celtic boss Ange Postecoglou erawh fimkhur takin a ṭawng a, Australia coach hlui chuan, "Kan hmasawnna avang hian phul chiam ka tum lo. Result ṭha leh khelh dan ṭha hian team-ah inrintawkna a tuh ṭhin a, tun hi kan tawpna tur a la ni lo," a ti.

Scottish club hian Pathianni zan dar 7:30-ah Hearts mikhualin Scottish League Cup second round an khel ang a, August 19 zanah Dutch club ṭha AZ Alkmaar nen an inkhel leh ang.