Fans tel loa champion hlau Virgil van Dijk Premier League a tawp dawn em?

Liverpool defender Virgil van Dijk chuan an hma lawka inchhawp Premier League nomawi an chawi hunah fans an awm loh a hlauhthawn thu a sawi a, "Fans tel loa inkhelh chu tumahin an duh lo. 

"Stadium ruak vekah nomawi chawi ila, fans tan pawha a hrehawm turzia chu ka hriatpui a ni," a ti. Premier League hi coronavirus vangin April 3 thleng chu khelh rih loh tura tih a ni a, Liverpool hian point 25-in hma an hruai fal mek. 

Kum 28 mi defender chuan, "Anfield-a fans an awm loh chuan awm dan thiam a har khawp ang. Thutlukna tak siam a nih hma chu thil thleng apiang pawm thiam a ngai a, kan champion ta a nih chuan fan-te nena nomawi lawm turin kan kal tho ang," a ti. 

Liverpool hian Premier League nomawi chawi turin match kuaah vawi hnih chak bak an mamawh tawh lo a, Merseyside club hian Liverpool khawpuia fan-te nena nomawi lawm turin May 18 atan ruahmanna an lo siam lawk tawh. 

League nomawi chawi leh tura kum 30 nghak tawh Reds hian 'trophy parade'-ah hian mipui maktaduai khat vel pungkhawm turin an hisap a, league nomawi 19-na hi a ropui thei ang bera lawm an duh. 

Mahse, May 18-ah hian trophy parade neih theih pawh a nih a rinawm ta chiah lo. UK prime minister  Boris Johnson chuan karleh hian mipui vantlang punkhawm hrim hrim khapna thupek a puang chhuak tura ngaih a ni. 

Vawiinah hian UEFA chu an kal zel dan tur relin an ṭhukhawm dawn a, he thu chhuak a zir hian Premier League chuan Ninganiah ṭhukhawmin an kal zel dan tur an tichiang ve leh ang. 

Euro 2020 chu June 12 hian khelh ṭan a ni dawn a, thu lengvakah chuan UEFA hian inelna hi nakkuma khelh tura sawn mai a tum - vawiinah hei hi tihchian chauh tur a ni thung. Ruahman anga Euro hi kaltlangpui a nih chuan Premier League leh European league dang tan pawh league khel zo turin fixtures a 'tight' tawh ang tih a chiang a, infiamna khawvel kal zel dan tur pawh a buai ta. 

Brighton chief executive Paul Barber chuan tuna an dinhmun thlirin April 4-a Premier League an khelh ṭan leh theih a beisei loh thu a sawi a, hetihrual hian Reds chu champion-a puan mai a duh thu a sawi tel. Barber chuan, "Season duhawm tak an hmang tih kan hria a, champion-a puan an nih loh chuan a fair tawk dawn lo a ni," a ti a, Liverpool lakah a khawngaihna a lantir. 

Hetihlai hian West Ham vice chairman Karren Brady chuan Premier League season kal mek chu engmah lo anga kaltir mai a duh thu a sawi - anni hi league-ah 16-na an ni a, 18-na Bournemouth nen an point hmuh zat in angin tla thei dinhmunah an ding mek. 

England chief medical officer professor Chris Whitty chuan May thla tawp leh June thlatir inkarah coronavirus hian UK-ah a vanglai a tawng dawn niin a sawi a, hei tak hian Premier League dinhmun a ti chiang lo lehzual. UK Prime Minister pawhin mipuite thlamuan ai chuan ralkhel dar vuak a fuh zawkin a hria a, "Tun hi kan hun thim ber a la ni lo," a ti a, Whitty thusawi ṭawmpuiin coronavirus chu la leng dawn chauhah a ngai.

 

BBC sports editor Dan Roan chuan April 4-a Premier League khelh ṭan leh chu, "Thil theih loh ang deuh thaw a ni," tiin a sawi a,  FA chairman Greg Clarke pawhin season kal lai chu tih tawp mai a duh niin an sawi.