Thorsby-a'n climate awareness atan a number a thlak

Football khawvela right back ten an hak ṭhin jersey number 2 ha turin Sampdoria midfielder Morten Thorsby chuan thutlukna a siam a, hei hi climate change (sik leh sa inthlak danglam) awareness atana a tih a ni.

Jersey number 2 a thlan chhan hi December 2015-a ram 196-in khawvel sik leh sa inthlak danglam zel, nakin atana pawi tur ven nana 2°C-a khawvel boruak temperature tihniam tura an intiamna hriatreng nana a tih a ni - he thutlukna hi United Nations Climate Change Conference-a an siam a ni a, 'Paris Agreement' tiin a hming an vuah.

Industrial Revolution (1800’s) hnu khan khawvel boruak (atmosphere) temperature-in san lam a pan nasa a, mithiam ten an zir danin khawvel boruak hi kum 100 chhung (1900-2000) 2 degrees Celsius-in a san belh tawh hial.

Temperature a san zel avang hian North leh South pole Glacier a tui ral nasa a, chu chuan 'sea level' tisangin Glacier (tlang pang aṭanga zawi zawia vur khawn tawlh) a titlem a, hei hian albedo effect (ni sa/ni eng khawvel a rawn lut vur varin khawvel pawna a reflect let leh) chu a tlem phah a, hei hian khawvel a tilum lehzual ta a ni.

Chung chuan harsatna tam tak a thlen a, glacier a tuiral a, 'sea level' a tisang a, tuifinriat temperature a tisang a, chu chuan a a aia nasain cyclone a thlen phah ṭhin.

Hetianga khawvel tempe-rature a san chhoh zel chuan sik leh sa avangin harsatna tam tak khawvel hian la tuar thei - hei hi United Nations Climate Change Conference 2015 pawhin a hrechiang a, chuvangin khawvel boruak thunun nan pre-industrialization (industrial revolution hma) khawvel boruak temperature a nih ṭhin ang khan 2°C-a tihniam leh turin ram 196-in inremna an ziak ta a ni.

Kum 25 mi Thorsby chuan, "Rawlthar ka nih lai chuan he khawvela ka awm chhan ngaihtuah hian ka rilru ka seng nasa ṭhin hle. Inkhelh ka ngai a, mahse, chu ringawt chuan ka nunah awmzia a nei ngai lo.

"Mi zawng zawng aia footballer ṭha nih ka duh a, chutihrual chuan ka thinlung chhunga thusawitu chuan kan chenna leilungin harsatna a tawh mek lai hian eng vangin nge football chiah i ngaihtuah? tiin min zawt a, inkhelh ringawt hian awmzia a nei lo.

"Inkhelh chawlhsan duhna thinlung hial ka pu hman a, ka chhungte nen kan inbia a, thil pawimawh tih nana ka nun hmang turin thutlukna ka siam ta a ni. Chuta ka tih theih ṭha ber chu ka phak tawka a ṭha thei ang bera football khelh a, climate change chungchang sawi zel hi a ni," tiin a sawi zui.

Norway tana vawi sarih inlan tawh Thorsby hian pawl pakhat 'We Play Green' tih a din bawk a, hei hi football khawvela inhnamhnawihten climate change awareness an neihna tura tih niin player tam tak chuan he pawl hi an thawhpui tawh.

Thorsby hian season hmasa khan Serie A-ah Sampdoria tan match 33 khelin goal thum a khung a, assist vawi khat a nei bawk - season bul ṭan nan Thawhṭanni zan dar 12:30-ah an inkhel dawn a, Coppa Italia first round match-ah Alessandria an hmachhawn ang.