Liverpool tan VVD a rinawm

Transfer bazar-a thawm nei na lo tak Liverpool-in an player ṭha chelh hna an thawh chhunzawm zel a, an defender rinrawl Virgil van Dijk chu kum 2025 thleng cham turin contract thar an ziahpui.

Kum 30 mi defender hian kum 2023 thleng Anfield-a khel turin contract a nei sa a, mahse, hei aia rei zawk cham tura contract thar ziakin Merseyside club-ah a career a hmang zo ngei dawn niin a lang.

Liverpool hian an player langsar zingah Trent Alexander-Arnold, Fabinho leh Alisson te chu contract thar an ziahpui tawh a, VVD an chelh leh takah chuan he team hi hun engemaw chen chhung chu English club ṭha pawl an ni reng dawn tih a lang.

VVD hian season hmasa khan hliam vangin league match nga chiah a khel a, pre-season match-ah a inlan leh tawh avangin tun season-ah Reds tan player pawimawh ni leh tura ngaih a ni.

VVD a hlim
Liverpool a pan hnua inelna hrang hranga match 130 khel tawh VVD chuan, "Liverpool tan theihtawp kan chhuah chhunzawm reng a, kan hma hunah eng nge lo thleng zel dawn hriat a châkawm tawh hle," tiin Anfield-ah hlimna tam tak chhar zel a beisei.

Van Dijk hian January 2018 khan Southampton aṭangin Reds hi pound maktaduai 75-in a zawm a, Premier League, Champions League, UEFA Super Cup leh FIFA Club World Cup-ah a champion pui a, PFA Players' Player of the Year leh UEFA Men's Player of the Year-ah hial thlan a lo ni tawh bawk.

Hliam vanga Euro 2020 pawh khel thei lo VVD chuan, "Vawiin ka thlen chin te, nuam ka tih dan te, club tana senior leh player pawimawh kan nih dante ka thlir a, nuam ka ti takzet - hei vang hi a ni mahna, he hmun hi ka in ang maiah ka ngai a ni," a ti.

VVD hian Liverpool a zawm hnuah league match 95 khelin vawi 72 a chakpui a, a win rate hi 76% a tling - Liverpool a zawm hnua league match 80 khel tling zingah ani aia win percentage nei ṭha an awm lo.

Champion beiseina
Liverpool-in player-te contract thar an ziahpui reng laiin transfer bazar-ah erawh an thawm a reh a, pound maktaduai 36-a RB Leipzig defender Ibrahima Konaté an lakluh bak player lakluh an la nei lo - fans tam tak lung a awi lo.

Mahse, Reds coach Jurgen Klopp erawh a zam phah lo. German coach chuan, "Manchester City, Chelsea leh Manchester United te sum ngahzia hi chu hriat sa a ni a, anni chuan tihdan kawng an hre zel. Keini erawh kan kalphung a dang a, player langsarte contract thar ziahpui hi a thar lakluh ai chuan a phurawm lo a ni mai thei.

"Mahse, keini chuan chu ngawr ngawr chu kan ngaihtuah lo a, team kan remkhawm theih dan tur hi kan thlir ber chu a ni. Tun hnaiah Alisson, Arnold, Fabinho leh VVD ten contract an ziak thar a, team dangin to taka an lei tur hi keini chuan kan nei sa a ni," a ti then!

Klopp chuan sawi zawmin, "Chelsea, United leh City te hian ualau takin an tum an tilang a, inzep kan tum bik lo. Inelna kan hmachhawn apiangah chuan theihtawp kan chhuah zel ang," a ti a, Arsenal, Leicester City, Tottenham Hotspur leh West Ham chu ngaihthah chi an nih loh thu a sawi bawk - Reds hian zanin dar 10:00-ah Norwich City lenchilhin an league zinkawng an zawh ṭan ang.