Engtik nge Messi a inlan dawn?

Ligue 1 khelh ṭan a ni tawh a, PSG-in an match hmasa berah Troyes 2-1 in an hneh. Zanin dar 12:30 hian PSG-in Strasbourg a hmachhawn dawn a, Parc des Princes-a inkhel tur hian Lionel Messi vangin ngaihven a hlawh ang.

PSG hian Nilaini khan Messi an tlangzarh a, Argentina captain hian Ninganiah training a zawm nghal. Messi chuan, "A hun ka sawi thei lo a, a hma thei ang bera khelh ka duh. Ka training neih dan a pawimawh a, ka dinhmun hriat a ṭul a, coach-in khel tlaka min ngaih a ngai bawk," tiin a sawi.

A lan dan mai chuan PSG leh Strasbourg-ah chuan Messi hi a inlan hman a rinawm a, chutihrualin a khel thei a nih chuan entu 50,000 an punkhawm theih tawh avangin Parc des Princes-ah thawm a ṭha khawp ang.

Hetihlai hian player thar pahnih Georginio Wijnaldum leh Achraf Hakimi te chu Troyes lakah an inlan tawh a, chutihrualin star player awm sa Neymar leh Marco Verratti bakah player thar dang Sergio Ramos leh Gianluigi Donnarumma te an la inlan bik lo. Ramos hi chu inhliam vangin beisei theih a la ni lo ang.