Messi tel lohna La Liga an khel dawn

Real Madrid legend Cristiano Ronaldo chuan kum 2018 khan a puanthuah telin Santiago Bernabeu a mangṭha a, Juventus lamah ropui lehzual tumin a inpu lut.

Ronaldo chhuah khan football khawvel a ṭhawng a, mahse, La Liga-in Lionel Messi an la neih miau avangin Spanish top flight league hian an hlauthawng lo - a awm viau.

Mahse, thil thleng thei lo tawp anga ngaih kuminah a thleng a, Messi-a'n Barcelona a chhuahsan ve leh ta - Ronaldo leh Messi tel lohna league hian season dang angin ngaihven a hlawh tawk ta lo.

Spanish football inelna sang ber hi nizan dar 12:30 khan Getafe leh Valencia ten an khuh hawng tawh a, kar tawp inkhelah Real Madrid, Barcelona leh Atletico Madrid an inlan ve leh dawn.

Barca an buaina
Lionel Messi meuh an chân hnuah pawh Barcelona an la in chingfel hleithei lo a, he team talbuai hian Pathianni zan dar 11:30-ah Real Sociedad an mikhual dawn - tunlai an club boruak thlirin chak tura dah nghal ngawt a rem bik lo.

Euro tluklehdingawn khat chuang nei Barca hian La Liga-in season khata hlawh atana sen an phal zat chu Messi chhuah hnuah pawh an la pel viau a, hei vang hian an player lakluh tharte pawh squad-ah an ziak lut thei lawk lo - an talbuai takzet.

Catalan club hian Gerard Pique, Sergi Roberto, Sergio Busquets leh player dang engemaw zat chu an hlawh tihniam turin inbiakna an neihpui mek a, Miralem Pjanic leh Samuel Umtiti te chu a rang lama an chhuah theih dan tur ngaihtuah a ni mek bawk.

Sergio Aguero chu hliam vanga inlan lo tur chiang a ni a, he thu buatsaih a nih thleng hian Memphis Depay, Eric Garcia leh Emerson te chu Sociedad hmachhawn tura an inlan theih dawn leh dawn loh a la chiang lo.

Real chu
Barcelona elpui ber Real Madrid chu zanin dar 1:30-ah an inlan dawn a, khualmualah Alaves an lenchilh dawn - an khingpui tur enin chak tura ngaih an ni a, football-ah eng pawh thleng thei a nih avangin ngaihthah erawh a thiang lo ang.

Ṭum dang angin sum lamah Real an pawk bik viau lo a, Barca aiin an ropui tehchiam lo - tun season-a an player lakluh awmchhun chu David Alaba chauh a la ni rih a, Bayern Munich aṭanga an lakluh defender pawh hi free transfer-a an lakluh a ni.

Carlo Ancelotti enkawlna hnuaiah Real-in insiamṭhat theih an beisei a, transfer bazar-a an chet dan leh an player neih sa enin beisei san viau erawh a harsa. Real tan Eden Hazard chu inkhel turin a inpeih leh tawh a, pound maktaduai 150 man forward tan a man phu khawpa khelhchhuah a hun tawh.

Gareth Bale-a'n Ancelotti hnuaiah intuaihriam a beisei dawn a, Hazard nen an 'form' ngat chuan league nomawi chawi turin an ṭha tawk. Covid-19 a vei hnuah Karim Benzema dam tawh mah se a tan bul ṭan nghal tur chuan a la hma hret mai thei.

Champion lai Atletico
Real Madrid leh Barcelona tana hnawksak bera chhal ngam chu Atletico Madrid an ni a, transfer bazar-a thawm reh tak Atletico hi La Liga champion lai an ni - Pathianni zan dar 9:00-ah Celta Vigo lenchilh an nomawi humhim hna an ṭan dawn a, a awlsam lo ang.

Atletico hian euro maktaduai 35 man Rodrigo De Paul an lalut tih loh chu transfer liantham an thlentir lo a, Argentine midfielder hian theihna a neih san avangin Spanish club tana a inlan tur hi en a châkawm tawh hle.

Brazilian club Fluminense aṭangin rawlthar beiseiawm Marcos Paulo chuan Atletico hi free transfer-in a zawm bawk a, Brazil-a piang, age level-a Portugal tana inlan forward hi kum 20 mi lek a nih avangin rinrawl erawh a nih nghal a rinawm chiah lo.

Atletico-in La Liga nomawi an chawi theih nana goal 21 khungtu Luis Suarez-a'n bul a ṭan nghal a rinawm chiah lo a, Copa America khelh chauh vangin Uruguayan forward hian squad a zawm tlai - a hmun ruakah Angel Correa chu lut tura ngaih a ni a, Kieran Tripper leh midfielder Renan Lodi te pawh bul ṭan tura rin a fuh lo ang.

Player thar kan nei nual a, hmasawn kan mamawh a, chutiang tur chuan hun pawh kan neiin ka hria. Player naupang tak tak kan kawl nual a, kan thutlukna reng reng kha club hma hun thlir chunga siam a ni. Chuvang chuan tun hnaia thil thleng ai chuan kan hma hun hi kan thlir a pawimawh zawk. Messi-a'n season hmasa khan goal 30 a khung a, goal khung kawngah harsatna kan tawk dawn tih hi chu thil chiangsa a ni. Hei vang hian player-ten mawhphurhna thiam taka lak a, hma an sawn a ngai a, tunah chuan mimalah ni loin team-ah kan innghah a ṭul ta. Player pakhat chauh ngaihtuah theih a ni lo a, team anga kan ṭanrual a ngai. Ansu Fati leh Coutinho te an lo kir theih thuai ka beisei a, an awm lo chung pawhin squad chhah tak kan la nei tho. A hma zawng aiin kan thawkrim lehzual ang a, mipuiin kan laka an beisei an hmuh theihna turin theihtawp kan chhuah ang. - Ronald Koeman, Barcelona coach