Quarterfinal-ah Medvedev leh Tsitsipas

Stefanos Tsitsipas chuan a kum 23 tlin lawm nan Karen Khachanov chu 6-2, 6-3 in a hneh a, inelna neih lai Toronto Masters-ah quarterfinal a inhlangkai. Champion tura rinkai Daniil Medvedev pawhin hnehna a chang.

Ningani zan inkhelah Tsitsipas hian harsatna a tawk lo a, amah ṭantuten hnehna a chan hnuah 'Happy Birthday' tiin a piancham an lawmpui a, inkhelh bakah cake an lo buatsaihsak bawk.

Greek tlangval Tsitsipas chuan, "Tennis court chhunga thil tawn nuam leh hlimawm berte zinga mi a ni ang," a ti. Tokyo 2020-ah khan Tsitsipas hian Novak Djokovic a ngam lo, inelna a hmachhawn lehna hmasa berah a khel ṭha nghal hle.

Quarterfinal-ah chuan Casper Ruud a hmachhawn leh dawn, seeded parukna hian inkhel dangah Dusan Lajovic chu 6-4, 6-3 in a lo hneh ve thung. Ruud hian May thla khan Madrid Open-ah Tsitsipas hi straight set hmangin a lo hneh tawh.

Inkhel dangah seeded pakhatna Medvedev chuan James Duckworth 6-2, 6-4 in a hneh. Russian tlangval hian a match lehpekah chuan Hubert Hurkacz leh Nikoloz Basilashvili te inkhela chak zawk a hmachhawn leh ang.